fbpx

#002(12/6/2022)

Ryan

m

Re Pillow Co. 週記

12/06/2022

本周周記!

又到一個星期了!等我喺呢個無人睇嘅地方打啲嘢先!今個星期有咩發展?

今個星期開頭可以話係都好難捱,但去到尾後就好啲,等我逐一解釋:

星期日意外,因禍得福

喺星期日下晝,當我喺度如常喺屋企做緊嘢時候(當時我喺度寫緊一份合約,用於之後同另多3間公司一個研發產品合作),突然收到同事電話,發現門市出現咗一啲問題,問我應該點處理。當時問題嘅嚴重程度係令我必須放低手頭工作,出去現場解決問題。問題後來大概用咗一兩日時間解決咗,詳細唔講,但基本上係一個比起開頭以為嘅嚴重程度係細,我亦立即安排到同事,星期一返工再解決咗。問題現時已解決,但因為佢揭示咗一個可以進步嘅地方,我哋下一兩星期會開始實踐一個更好嘅方案,雖然會增加成本,但唔單止可避免類似問題,而且仲係令我哋更進步。

朋友加入,騰出時間發展

今個星期亦係我2位朋友加入 Re Pillow Co. 嘅日子,開心喺過去幾日大家慢慢上手,現時有多一啲幫手,顧客服務、聯絡溝通、出貨日常都有多啲幫手,感覺唔再係獨力支撐,確實係幫助好大。騰出時間可以做返啲例如寫下呢類文章,研究產品、發展合作、同做一啲新嘅 Project,如開始門市同更多零售點等等….. 呢啲確實都係好緊要嘅事,奈何以往我日日都忙於處理日常事務,淨係搞日常運作都搞大半日,而間唔中又有啲意外要處理,好難有時間發展將來。喺今個星期後半部,情況開始好轉,我多咗時間去發展 Re Pillow Co. 未來。

忙碌之極,思考如何運用時間

上月中我考完所有試,正式全職做 Re Pillow Co.,但感覺比起以前仲更加忙。我基本上每日都喺度做嘢,而行路或做其他事時,都係諗住 Re Pillow Co.,夜晚有時亦做到好夜過12點,但為咗每朝準時出貨,比到更多客人快啲收到產品,我每朝6點左右起身,先健身,再快快返公司處理每日訂單,變咗好幾次都會下晝個人好攰好眼瞓。我睇過一本書叫 80/20 Principle,明白現時呢個係唔健康,亦係唔明智使唔用時間嘅方法,所以呢個係未來幾星期要改善嘅地方。諗清楚時間要如何運用,先可讓 Re Pillow Co. 客人得益。

準備 Re Pillow 2 XL(暫名)

一直只聞樓睇響嘅 Re Pillow 2 XL 長枕頭(亦稱攬枕)相信可於2星期至一個月內推出,但我暫時會預多少少時間寫做一個月後推出。呢個枕頭大概於3月中時首次公開。我哋嘅 final sample 已經做好。今個星期,所需嘅物料、配件、包裝等都已經準備好,有部分嘅工序甚至已經開始做緊,做好咗一批半成品。我相信如一切順利,首批可以2-4星期後推出,一路銷售一路繼續做。尺寸方面,除長度係3尺長以外,闊度、高度以及其他都與現有 Re Pillow 2 枕頭一樣。現時我亦在準備圖片和介紹,製作其專屬頁面。

更多門市 / POPUP?

今個星期我亦喺門市方面有啲進展,但呢個只能暫時保密,希望你可以理解我不便如此公開。如果現時嘅太古城體驗館為門市1.0,我們已在開始準備2.0及3.0。汲取現有1.0的經驗,相信之後的會做得更好。

最新週記

0