fbpx

#008(24/7/2022)

Ryan

m

Re Pillow Co. 週記

24/07/2022

又一星期係時候寫週記,講!今個星期又有啲咩進展?

本週 UPDATE #1:新增幾款網上付款方式

呢個星期我哋喺網站新增咗幾種付款方式,包括轉數快 FPS、Alipay HK、WeChat Pay (香港及國內版),以及銀聯 Union Pay。 客人結賬嘅時候,可選用以上方式付款。揀好以上其中一款付款方式後,網站會顯示一個 QR Code,客人只需用相應嘅手機 App 掃瞄嗰個QR Code 即可付款。

另外,其實我哋都申請緊 HSBC 嘅 PayMe ,希望快啲可以喺之後幾星期推出。

本週 UPDATE #2:推出 Re Pillow 2 XL(+點解會推出?)

好耐,大概一年前,已經有人問我哋可唔可以做長枕頭,最印象深刻嘅原因就係因為兩個人(通常年輕情侶/夫妻)要 share 一張3尺闊嘅床,因此放唔落2個正常嘅成人枕頭,其中一個人要瞓小童枕頭/咕臣/毛公仔。我當時雖然口中話「唔得呀,做唔到」,但心入面其實一直耿耿於懷,喺度已經諗緊點樣可以實行。我唔鍾意輕易承諾別人,因為如果最後真係做唔到,會比咗假希望人,做唔到只會令人更加失望。

但隨著做枕頭時間越長,呢類查詢亦自然收得越多。

我每次都只可硬起心腸覆「唔得呀,做唔到」,而每次我都感覺到屏幕另一邊嘅嗰位客人嘅失望,其實自己心入面好難受。我知道我要等到實際好有把握嘅時候,先可以答對方:「其實,我已經準備緊,我好明白。我知道市面上冇人做依樣野,你俾啲時間我。我一定會幫你」

我知道 Re Pillow 2 XL 其實未必係咁多人需要,但係兩個人迫埋同一張單人床度瞓又搵唔啱枕頭一齊用,我好明白。年輕時,當然想同自己心愛嘅人一齊住,晚晚相擁而睡。

可能你同佢都未有咩收入,但死慳死抵,努力打工兼職,為嘅就係可以同佢一齊住。你明明可以返屋企,但你卻同佢一齊合租一個細細嘅單位,裏面只有一張3尺闊嘅單人床,兩個人,就係咁樣瞓。攬住佢瞓,你覺得好幸福,彷彿已經擁有了全世界。

Re Pillow 2 XL 其實就係為呢種情況而設。出面嘅人講緊 Queen Size King Size 床,但佢哋未必係瞓得開心。你同佢,兩個人瞓喺同一張單人床,共用一個長枕頭攬實,卻係最幸福。再大嘅床,比你哋都無用,因為你哋會攬住大家,痴埋一齊瞓。 

如果你真係睇緊呢篇嘢,而又真係買長枕頭為咗可以同佢一齊攬住瞓,我請你好好珍惜對方。我仍然年輕,但我身邊亦有啲大年紀啲嘅朋友話比我知,呢啲日子一定要珍惜,因為再大啲嘅時候,你哋可能唔會再有機會過呢啲簡單而幸福嘅生活。唔係話邊個變咗,而係大家都年紀大咗,要求會高咗,即使大家都搵多咗錢,卻好難好似以前咁少少事就開心。依一刻,可能你同佢可以一齊去長洲過一晚,食下大魚蛋同腸粉已經好開心。或者有一日,你哋兩個特登請日假去住 Four Seasons,再落樓下 IFC 買名牌手袋都唔會特別開心。

當然,我都係聽人講,但我都信嘅。人越大,要滿足同快樂越來越難。 

返返嚟啦,Re Pillow 2 XL 其實就係為兩個人迫迫地攬住Share一個枕頭而設的。所以點解唔再出長啲,其實呢個都係原因之一。再長嘅枕頭,其實都無意思。

本週思考:為何我哋 Re Pillow Co. 每一個決定都要小心

今個星期仲想分享多一樣嘢,呢個比較現實啲嘅。最近一直都諗緊一樣事情,就係其實我現時為 Re Pillow Co. 做嘅每一個決定,尤其牽涉到錢,都好小心,同要做得好好。

大公司佢哋有著幾十年嘅優勢同埋股東嘅大量資金,佢哋可以有空間去犯錯,因為即使有一啲錯誤,公司有一定規模,都有能力可以承受到損失。佢哋亦可花大額請某某藝人做廣告或者做啲好大型嘅長遠公司形象宣傳。但我哋唔得,我哋每一個決定都要好小心做,而且投資落去嘅錢要真係可以為公司帶來短期正面作用先得,如果唔係,我哋就即時生存唔到,就要倒閉。好現實好現實,但係真。

結語

好啦,今個星期就寫到呢度。我好想 Re Pillow Co. 可以成為一個真正屬於你同我嘅品牌,所以即使無人睇呢個週記,我都會繼續寫,因為我知道香港某一角落嘅你一定睇緊。可能我未見過你,可能你都未見過我,但你同我大家都要喺各自生活到加油。生活好難,但大家都要努力。我好相信我哋做嘅嘢,上天一定睇到,天道酬勤。呢一刻嘅辛苦一定會係無白費的。多謝你睇我寫嘅週記,多謝你成為 Re Pillow Co. 旅程入面嘅一份子。

最新週記

0