fbpx

#009(31/07/2022)

Ryan

m

Re Pillow Co. 週記

31/07/2022

「可能無人想睇,但有人想寫。」

Hello 我係 Ryan!歡迎你嚟到我嘅週記,你係一個非常非常特別嘅人,知唔知點解?因為根據網站記錄,呢個週記其實係接近無人睇的。零。ZERO!但你喺度睇緊,所以確實好想多謝你,好!又係一週回顧嘅時候,今個星期又有咩分享?

#1 做好每一個細節

可能你都知道,其實 Re Pillow 係一個大概兩年前,我(Ryan)自己一個「Passion Project」,我想試下自己整一個真正好用舒服,一個完美嘅枕頭。因此我踏上咗呢個研究枕頭之旅,喺度研究點樣整一個好枕頭,又去試市面上啲其他枕頭再睇人地點做再自己研究,先做咗第一代 Re Pillow 出嚟。當時都係可以好似自己玩玩下吧,應該準確啲講係唔係話想賺錢,而係想研究多啲。我自己心入面覺得,研究好玩,而且當慢慢實驗試到成果,做到啲好舒服嘅質感出嚟,我真心好興奮。

本來我都只係分享比身邊朋友用下,但係去到後來,咁真係開始多咗人買了,於是我漸漸感到吃力,因為我發現我原來唔識點樣做生意。每一件事對我都係新嘅,點樣去經營,點樣去確保客人可以得到最好嘅產品同服務,原來並唔簡單。

例如近日我哋面對嘅一個問題係有客人話速遞公司嘅員工態度唔太禮貌,又或者派貨時間太夜。我哋現時其實都係只係用出面嘅速遞公司派貨,確實係唔係太控制到呢一點,但係都總係想做好啲,因此都會反映比速遞知,亦都在尋找其他方案。開頭做 Re Pillow 時,有時送貨係我自己本人搭巴士送去人哋度的,但現時太多事情做,做唔到,一要將事情交比其他公司做,而且數量多少少,就遇到呢類問題了。不過我都知呢個會係必經階段吧!

有句話叫做 Small leak sinks big ship(一小道裂痕可以讓大船翻沉),我覺得確實係要小心的。我睇見好多好多公司可能一做到大咗時候,管理又未必可以睇見到所有問題,尤其規模一大,公司太多地方可以出問題,變咗公司開始出現不同嘅小問題,而且市場競爭激烈,慢慢慢慢,顧客都意會到其他公司做得更好,或者更吸引,真係可以令一間大公司就咁玩完。好似大概 2010-2015 年,HTC 手機都曾經红極一時,但好快隨住競爭激烈,以及旗下手機出現各式小毛病,好快亦被淘汰。

因此呢個亦都啓發我喺公司內部實施咗啲新政策,就係公司同事每月月底佢哋都要私下提出3個建議比我,公司先會出薪金。每一個同事嘅崗位唔同,希望可以比我睇到多啲事情,可以改善公司。呢個只係其中一個方法,我亦有其他方式實行緊同計劃中,希望可以令 Re Pillow Co. 持續進步,因為我係真係想咁做,我想 Re Pillow Co. 可以真係做得好,希望到時你都可以一齊見證。

#2 建立系統讓公司無咗我都得

最近一星期我亦喺度試緊慢慢試下交多啲任務比同事處理,因為我想公司無咗我都得。呢個係我從飲食業一個我好尊敬嘅人,黃傑龍先生度學返嚟的。黃先生佢係敍福樓集團主席,旗下比較廣為人知嘅餐廳有牛角、溫野菜等。當中佢有次訪問提到就係唔想自己成為公司發展嘅瓶頸,亦即係佢唔想自己會限制咗公司發展,佢好想公司可以無咗佢都可以運作到,運作得好好。雖然短短呢句對好多人講無咩特別,但對我嚟講卻好入心。我係直頭暫停咗段訪問,再慢慢深思。因為現時 Re Pillow Co. 確實好多事情都係我自己一個人做,而確實有試過我想去戲院睇戲都睇唔到,因為要隨時做事,有電話隨時打入(例如速遞公司或其他同事),我實在唔可以走開2個鐘無上網。所以黃先生嘅嗰句,真係正正我需要嘅。

咁講,如果要做到完完全全公司唔需要我,應該暫時做唔到,我亦都唔想,因為我真心好鍾意我每日做嘅嘢。但係我都想可以間中可以行開,因為如果我有咩突發病痛或要入院,我都希望同事可以幫我處理打點每日運作及要務,維持 Re Pillow Co. 可正常運作,唔好因為我唔喺度而無人寄貨、無人可處理公司運作,令公司停哂。

就此好想多謝我哋同事阿 Ben 同阿沖近2個月一直幫我好多(其實仲有 Colly 都係!我好感覺到佢哋每一位都好真心想幫我同為 Re Pillow Co. 呢個 project 好,其實已經超出佢哋嘅範圍),我亦都會努力做好我嗰部分,令公司可以有穩定嘅收入,等大家可以繼續一齊做落去。

雖然我哋唔係好多人識,但我哋都會繼續努力!

最新週記

0