#012（21/08/2022）

（圖為星期六早上首次以環保版包裝出貨）

歡迎來到本週週記！今個星期我哋開始推行環保版包裝，亦有翻譯及整理網站，改善太古城體驗館體驗，以及準備緊更多未來半年內嘅計劃。歡迎嚟到我哋嘅週記。

今個星期嘅週記會比較簡短，因為做緊嘅事情好多都牽涉未來新產品資料，我想保持神秘之後再揭曉。 但係亦都做咗以下嘅事情：

#1 環保版包裝

首先，我們開始推行環保版包裝。首先就會在成人正常尺寸 Re Pillow 2 枕頭上推行，如果反應不錯，慢慢會擴展到其他產品。新嘅包裝可能睇落只係轉左物料，但係其實並唔係咁簡單。 既然呢篇係我嘅週記咁我就寫得多少少！首先第一樣嘢就係依種紙皮係可以完全循環再造， 其次更加重要嘅係紙質厚薄我哋係揀到可以比較堅硬少少因此就可以承受到速遞嘅時候碰撞。 以往使用白色盒（經典包裝盒）時， 速遞時要再加上另一層啡色盒保護， 因此就變咗有兩個盒，唔環保。 其實呢樣嘢都係好多唔同產品都係咁， 例如如果你網上購買一啲例如手提電話同埋平板電腦 ，佢哋多數一個白色盒以上再加一個啡色盒先速遞 ， 當然咁樣可以保護白色嘅盒可以完美無瑕， 但係其實浪費咗一個盒。 因此我哋今次環保版夠硬身嘅紙皮盒， 就可以一個盒過，不用再加外盒直接速遞，減省左超過一半嘅耗紙量。 尤其呢啲枕頭包裝盒可能好多人買完返去都係直接掉， 真係唔好浪費。

#2 「環保政策」頁面

題外話：因為慢慢做落做落，積累咗幾個唔同嘅環保方面政策， 為咗方便一次過睇， 我將佢哋歸納咗一版環保政策，喺網站個底啲link度可以Click落去睇。 嘩感覺真係好似大公司！（笑） 雖然其實我哋都係扮大公司... 

#3 更新網站及「加入我們」頁面

其次， 講開網站，今個星期我都更新咗網站唔同嘅部份， 將一啲舊資料更新咗， 亦都加咗一版新嘅「加入我們」，一樣喺網站個底啲link度，有職位空缺可以讓人加入。 不過暫時就未喺社交平台或者其他搵工平台度公開， 或者之後都會了， 依家純粹整定一頁喺度準備住先。 好希望可以有一啲有興趣嘅人加入我哋。期待你聯絡我！

#4 再推英文版網站

另外我今個星期都喺度翻譯緊網站做英文， 其實以往係曾經有英文網站的， 但後來我哋今年5月時重新用新嘅架構去整過個網站， 因此個英文網站就咁冇咗， 當然舊嘅頁面我有留存備份， 嗰啲翻譯可以用返， 但係過去呢三個月都有好多新嘅頁面新嘅介紹， 因此我就喺度翻譯緊， 希望一個月之內可以再推出英文版網站！

#5 太古城體驗館

太古城體驗館嗰方面我哋都喺今個星期實施咗啲新嘅改變， 例如客人以前試枕頭嘅時候，我哋冇一個茶几仔比人哋放下背囊、隨身物品， 因此我哋近排就加咗， 應該會更加方便。 另外就係由於我哋產品增加咗，所以我哋亦都增加咗一個新嘅櫃去陳列，亦都加多啲地方存放現貨， 增加多啲供應。 另外我哋設計部同事亦都設計左一啲「介紹小冊子」打算印出嚟，可以比客人 喺太古城體驗館拎嚟閱讀，了解我哋嘅產品。 呢個應該可以下星期就會印好，放入舖頭。 仲有更多唔同嘅細節有改善， 例如可能加啲小心梯級嘅提示字句，呢度就唔講了。

今個星期仲有其他嘅事我做緊， 但因為關乎新產品因此我都係賣個關子先， 下星期再見！