fbpx

#019 忙碌的一週(09/10/2022)

Ryan

m

Re Pillow Co. 週記

09/10/2022

歡迎大家嚟到週記第 19 回,繼續同大家分享 Re Pillow Co. 每週工作同事情。

Re Pillow 又斷貨

今星期我哋有多咗啲啲客人購買,由於我哋產能仍然好有限,因而只要多可能十個二十個枕頭我哋已經會有啲做唔切。因為咁,今個星期忙於追趕製作進度,星期六日同重陽節紅日都返咗去做。幾個月前我亦只一星期喺廠工作6日,但現時要7日了。曾經有客人好心提過話點解唔整定多啲吖?其實都係因為「土地問題」,香港地方細,租金貴,我哋仍未有足夠地方去理順啲生產,成本負擔唔到。或者亦都係因為我我哋自己做 Re Pillow 枕頭生產嘅方法現時係非常之似做「手工藝品」,完全唔係好 Efficient,工廠Floom Floom聲咁樣嘅自動化方法,所以變咗所需時間長,成本高,而且一定做唔大,呢個係自己都知。加上自己年紀細,無經驗,所有事情都係摸索同嘗試。抱歉真係要好多人等咁耐,但我哋一定會盡力努力一個個做好的。唔心急,但最緊要快。加埋 9/10 星期日都會返去做全日,現時預計下星期中可以寄出哂。

又,今個星期有位現有客人嚟我哋太古城體驗館,同我哋講真係好鍾意個枕頭,幫我哋推薦咗比好多朋友,並一次過再買多咗6個,在此實在好感激呢位客人對我哋工作嘅認同,其實係對我好鼓舞。感激並唔係因為佢買咗好多個,而係因為佢對我哋嘅信任,我真心好感恩。多謝你,亦都多謝其他曾經鼓勵過我哋,又或者曾經買過我哋產品試過我哋嘅嘢嘅每一位。因為你哋,令我哋可以繼續行落去。

Post-purchase Support Centre

有時我哋都會收到客人 send message 查詢,同我哋講自己唔太識點樣較啱自己嘅枕頭高度,可能因而甚至瞓得唔啱高度唔舒服,呢件事情令我一直喺度諗點樣可以做得好啲。

其實我做呢個枕頭就係想大家瞓得好,可能因為 Re Pillow 係我一手設計同整出嚟,我亦每日自己瞓緊,我對呢啲「唔識用瞓唔好」嘅 message 尤其上心。我知好老土,但我好想透過 Re Pillow,可以令大家生活過得好啲。社會、工作、做人每日都有好多令人唔開心嘅事,亦有好多困難要我哋獨力面對,但至少返到屋企張床,可以舒舒服服,簡簡單單咁瞓覺好。

一如今篇週記上面提到,其實我深知 Re Pillow 現時「手工藝品」般嘅生產模式我哋永遠都做唔大,所以我諗:倒不如做好自己,喺自己5尺範圍內做得好啲,改善客人體驗,產品又不斷進步(關於 Re Pillow 2 系列近期的產品改進可參見9月週記 #016),雖然規模細係細,但客人用得滿意,呢個仲比起話要做到點樣大、點同其他床上用品公司比較,更令我開心啦。

Re Pillow 同外面好多枕頭唔同,係有需要用家自行調節啱自己嘅枕頭高度。因此為咗去令更多人可以輕易啲識得點樣去用個枕頭,去搵啱自己嘅枕頭高度,呢個星期我喺度起緊一個簡單嘅網站,我稱之為「Post-purchase Support Centre」,去整多啲解說、影片、圖片、教大家點樣去使用個枕頭同埋搵啱枕頭高度,點樣瞓先最舒服。相信呢個網上 Support Centre 係應該可以幫助到一啲用家。

呢個 Support Centre 網站現時我已經做緊,希望可以於幾星期內面世。

Re Pillow Co. 的中文名

今個星期有日心血來潮,趁臨近 Re Pillow 兩週年,搵返啲舊嘅相嚟睇吓,先醒起當年曾經自己諗住為 Re Pillow Co. 改個中文名,叫做「創床廠」

懶係食字,好低B嘅名:「創床廠」

不過當時諗每個字都有意思:「創」代表創新,「床」代表我哋做床上用品,「廠」代表我哋係一間工廠。當時一諗到呢個名時,覺得非常正, 簡直好似 Re Pillow Co. 個名一樣咁,都係有啲創新意味,但又有3個同音字咁。

(雖然後來好快覺得太「玩嘢」,唔專業,所以自己最後無採納)

不過純粹分享下比大家聽喇!

夜已深,今個星期就此擱筆,下週再見!

最新週記

0