fbpx

#021 改善太古店、新店、速遞公司(23/10/2022)

Ryan

m

Re Pillow Co. 週記

23/10/2022

歡迎嚟到本週週記,繼續由我同大家分享一下工作上的趣事同各樣事情。如果有睇上星期 #020 週記,就會知道我哋做咗啲特別事情,但嗰件事先暫且唔講住!因為未準備好。今個星期週記3件事:

  1. 太古店嘅微細 Improvements
  2. 新嘅門市商店
  3. 想襯機會講一講我哋網店使用嘅速遞公司嘅事。

1. 太古店嘅微細 Improvements

上星期自己到太古城門市幫手時,發現同事行開要貼喺門口嘅嗰張「離開5分鐘」嘅紙好似唔係太靚,只係一張電腦打印,寫住行開5分鐘嘅紙。呢個係我唔好嘅,之前無諗到呢個問題。張紙又皺,而最大問題係無一個離開時間同回來時間比客人。因此我返到公司就即刻好簡單開個Word整咗一張呢個「過膠卡」用嚟比同事可以行開時用,同事可以用白板筆寫行開幾耐,離開幾點,同事同客人都有分數。今個星期二我再落太古城幫手時已見到舊嘅紙仔已唔見了,取而代之係呢張「過膠卡」。其實實係好簡單嘅事,但我覺得係值得記低,因為如果一間大公司,老細永遠唔落前線睇下有咩問題/可改善嘅位,公司係唔可以做得好的。我要永遠記住呢件事。

2. 新嘅門市商店

是的,我哋最近喺度籌備緊我哋第二間自己嘅門市。 咩地點就唔講啦,但可以講嘅係我哋即將開始裝修!現時設計圖同Concept等我已經畫好,今個星期亦都相約咗我哋嘅裝修師傅一齊到現場再度尺,傾設計、燈光、牆身、地板等等,舖就唔會好大,只係大現時太古城啲啲,但多一個地點可以摸到睇到試到我哋嘅產品都係好嘅。呢個我哋之後未來會有更多 Update。

3. 速遞公司

我其實已經想同大家講關於速遞嘅事好耐了,但我知寫出嚟應該悶死人,Facebook / IG 唔會有人想睇呢啲。週記我知道係完全無人睇嘅,因此任我寫,喺度一於寫下我哋搵合適速遞嘅困難,希望都可以比大家了解我哋工作多啲。Have an inside look of our business. This is what I wanted to give everyone. 我只係一個好平凡嘅人,我有時唔知自己有咩可以留到比個世界,所以決定將啲嘢寫低,希望有日會有人受用,所以我寫週記。

返返嚟。

一直以來,我們都係透過外面嘅速遞公司負責送貨,當中我哋試過好多唔同嘅公司,包括郵局、一啲本地小規模嘅物流公司、大少少嘅速遞物流 Start Up,以及最多人認識嘅 K 及 S 兩間速遞公司。

當中試用唔同速遞物流公司好多慘痛經歷,諸如送貨送咗半個月客人都未收到,唔知送貨送咗去邊最後喺佢哋自己速遞公司嘅倉到搵返,又或者個Tracking Status一直整個星期無update,一update 就已經係送咗貨,又或者朝早7點幾打電話嘈醒客人話送貨,夜晚12點打比客人話件貨放低咗喺門口,速遞同客人講今日會送結果甩底令個客人喺屋企白等咗全日…… 呢啲種種嘅可怕事情喺度都唔度詳細講,因為係另一個故事嚟,有興趣可以之後再講。

總括而言,試咗好多本地寄本地物流公司,大嘅細嘅唔同背景都有,都試唔啱,唯有兩間公司做得較好:K 同 S,亦係現時負責我哋網站速遞送貨嘅兩間速遞公司。

以下將會詳細啲分析點解我哋使用嘅呢兩間公司嘅優劣。

S 公司

先講講速遞S。S應該係最多香港人識嘅物流公司,個送貨網絡係全港最大最廣。優點真係好多:做野最少甩漏、送貨系統最成熟同埋最負責。如果有用過佢哋嘅tracking system都知,係連個速遞員叫咩名都睇到。無論係對客人嚟講或對我哋嚟講都係服務最好嘅公司。

咁點解我哋唔淨係用速遞S呢?最大嘅原因係佢哋設收件限制。S收件係有上限,一次過收唔到太多,尤其係枕頭呢類大舊嘅產品。S速遞員來我們廠收件時只係用一架小型手推車,裝滿咗就唔可以再收了,而我哋啲產品咁大件,其實係好易就裝滿。另外就係S公司需要我哋盡量喺朝早出貨,呢點就對我哋呢種小公司頗唔方便。因為我哋係每個工作天都出貨,人手同地方唔夠,有時候係朝早仍在準備緊訂單,訂單多啲嗰陣真係要做到晏晝先可以出貨,S嘅收件時間限制係令我哋用唔到咁濟。其中一個解決方法係每日提早截單做好前一兩日的單,擺喺度等佢第二日收,但某啲時間(例如前一日晚上/凌晨)嘅單就會慢咗出貨,可能客人嘅訂單要等超過24小時先出貨。同埋另一樣係嗰個寄件數量限制,始終仍解決唔到。

K 公司

速遞 K 係我哋現時除S以外用緊嘅公司。相比起S,K 係收件幾乎冇數量上嘅限制,可以一次收好多件;仲可以晏晝收件,本地送貨速度同S非常接近,可以講得上係最適合我哋嘅公司。收件量大以及派送快速亦係可能點解大家見好多公司企業送貨會用K公司,亦非更多人認識嘅S嘅原因。但K公司亦有其問題:雖然服務質素同專業程度已領先其他本地嘅速遞公司,但相較底下,甩漏比S多,以及速遞員質素未必及得上S 公司。話雖如此,送貨絕大部分情況下都冇問題,畢竟都係行內本地寄本地嘅龍頭大公司。所以現時我哋亦都用緊K,分擔S唔能夠收貨太多嘅問題。

現實係無完美,確實 K 公司係會有甩漏,亦有時會收到客人同我哋反映 K 公司送貨員態度唔好嘅問題,因此我哋都喺度積極搵/試緊唔同速遞公司。其實有啲速遞服務都好好嘅,不過寄一件件由寄出,去到派送要4-5工作天,如果係跨越週末,就會成個星期,再加佢哋有時有啲甩漏,客人就會個幾星期都收唔到貨,我諗應該好多人會唔太接受到。因為細型嘅速遞多數啲Tracking好無交帶,可以幾日無 Update,當一有 Update 就係「今日派送」…… 香港本地寄本地其實選擇確係唔多,但我哋呢方面會繼續努力的,希望令整個體驗好啲。

圖:S 公司同 K 公司收件方法嘅唔同。K 公司可以「成板」貨物用車拖走,一次過可以寄很多件,基本上是沒有上限。相反,S 公司只可以拿一架公司小型手推車來收貨,速遞員辛苦之餘,每日收貨數量有限制。

(感謝同事 Ben 幫手寫有關速遞公司選擇同優劣嘅部份,我知你睇緊,週記都係得我兩個睇)

今個星期就寫到呢度!下星期再見!

最新週記

0