fbpx

#023 新店裝修、新產品研發進度、發展與經濟(06/11/2022)

Ryan

m

Re Pillow Co. 週記

06/11/2022

歡迎大家嚟到今個星期嘅Re Pillow週記,又有我同大家分享今個禮拜嘅事情!首先第一樣嘢!就要講新店嘅裝修:相信有留意開我哋週記都知道新店其實已經喺一段時間之前開始籌備,而今個星期就剛剛交舖,開始裝修。

#1 新店裝修

但今個星期開始裝修嘅過程之中,其實就遇到唔少問題:例如因為我哋其實沒有一個設計師,只係得我去負責設計同埋去畫圖。呢啲設計圖、平面圖要喺裝修前交俾商場審批。但實在自己唔係專業,商場方面今個星期就「彈返轉頭」,因為我呢啲自己畫嘅圖未如水平(其實真係!我睇咗其他公司嘅設計圖都即刻呆咗,發現自己嗰個原來真係水平差得太遠了。人哋有晒好專業嘅線,燈位點樣排,氣流管等等,而我只係一個好普通嘅平面圖)所以今個星期我都臨時去請專業人士去協助。其實真係原來營運一件事唔係咁容易!牽涉好多唔同嘅人,雖然我哋慳得就想慳,但畢竟專業就係專業,自己學識嘅技能有限,無論我點樣識PS同埋AI兩個程式,但係有啲專業嘅知識真係缺乏,所以變咗真係要請外面嘅人去幫忙。今個星期因此呢就花咗啲時間去處理依啲事情,去畫圖、去請人、去同各方面聯絡,希望裝修可以順利進行,舖頭可以順利開張。

新嘅舖頭比起太古城體驗館會更加「似翻一間舖頭」,會有比較好嘅配套,同埋靚小小嘅裝修。不過成本所限,我哋都係盡做盡做喇,我自己唔想花太多錢係一啲唔係實質幫助到客人嘅事情上。

#2 新產品研發進度

另外今個星期我亦都花咗唔少時間去研究新產品嘅物料。現時嘅產品雖然係我做到暫時最好,但係都係未完美,可以再做好啲。因此今個星期我亦在採購啲唔同物料,去研究新產品,亦都同不同嘅公司商討合作,希望可以引進更好嘅物料及科技。To make ourselves proud。其實現時Re Pillow嘅物料係出邊沒有嘅,都係一個自己獨特嘅發明,呢樣嘢可能有好多人都唔知道,我亦好少講。我希望做,真係可以越做越好,而且最重要嘅係,唔係我自己講嘅,而係客人感受到嘅,見證住我哋嘅進步。係會難,但係希望做到。

我覺得呢個世界其實冇需要我去做一啲其他人都做到嘅嘢,或者本身呢個世界已經存在嘅產品/技術。我感覺咁樣冇辦法去真係幫助呢個世界變得更加好。要做當然係好應該做啲可以貢獻到社會嘅事情,可以令人類生活更加好,會有進步。講到好似好偉大咁,但係其實我都係普通人,其實我都唔係點偉大,純粹想做好啲自己,做好自己本分。

#3發展與經濟

有留意開香港嘅時事都知道,近一兩個月經濟真係好差得好緊要。呢個事情係直接影響咗我哋自己嘅計劃以及收入,亦都會影響我哋依啲咁樣剛剛起步嘅品牌發展。其實我真係好驚,好似驚每一步都會做錯咁,亦都令我哋行得穩陣啲,小心啲慢慢行。呢方面唔想講太多,總之就情況唔太好喇,但係都唯有努力啲做啦。

最新週記

0