fbpx

#031 Refresh 的背後理念(01/01/2023)

Ryan

m

Re Pillow Co. 週記

01/01/2023

今個星期主要做緊一啲2023第一季 Re Pillow 3 prototype design 同搞掂緊講咗好耐,由聖誕節推遲到1月,嘅全新 Refresh 產品,亦即係早前在Facebook/IG提過會送比舊客人嘅禮物。

Re Pillow 3 過多幾個月大家都有得試,咁我就唔講啦,只想講真係準備好耐,比起 Re Pillow 2 研發真係花多咗好多時間,更加用心認真,係一個好大嘅進步。畢竟 Re Pillow 2 研發時,Facebook IG like/ follow 數,夾埋都唔夠100,因此當時其實都係一個非常之初步嘅階段。而現時就當然要唔同。不過暫且唔講住,待到時有啲驚喜。

有人話咁早寫週記提到 Re Pillow 3 唔好,因為影響到 Re Pillow 2 銷情。但畢竟呢個係我嘅週記,我想分享就會寫。總不能夠每個星期明明做緊好多嘢,就係預備緊件產品,想寫又唔俾自己寫。至於生意一定有起有跌,好似做人,如果一生都諗呢樣唔做得,嗰樣唔做得,生活會好悶。我會寧願可以活出一個忠於自己嘅人生,至少我快樂。

話題一轉,我想喺度講少少關於 Refresh 嘅嘢。今個星期所有首批 Refresh 都已經做好了。

嚟緊我都會喺網站登 Refresh 介紹出來,到時關於產品嘅嘢可以喺嗰度睇。咁我就喺度人少少講啲嚟緊網站睇唔到嘅嘢,一啲背後分享。

Refresh 將會係一個慈善計劃。佢當然係一件產品,但呢件產品會係同我哋以往嘅產品唔同,呢件產品嘅所有收益,扣除成本後,所有一分一毫我哋都會捐出。而我哋嘅利潤會係 0%。到時睇到網站我會詳細列明成本資料同整個計劃詳情。

我明白喺現時 Re Pillow 都有經營困難時,要做一件咁嘅事情係好不合常理。Refresh 獨立出來嚟睇,質素同成件產品絕對可以賣到錢,幫助到我哋渡過難關,畢竟我哋都係真係需要新產品。

事實上其實我哋產品真係應該要推出得更加快同更加多,我諗俾好多公司都會咁做,賺取更多利潤。但我相信一件事情要做得好,先好推出,否則其實我亦都過唔到自己個關。好多行內嘅公司都係搵供應商買啲產品返嚟少少修改一下或者包裝一下,就當作自己嘅新產品,我唔認為呢個係一個好嘅做法,短期內可能可以為公司賺到錢,但係如果睇整個人類來講,其實佢冇幫助到人類科技同生活質素嘅進步。

講遠咗,不過呢個都可以講到俾大家知點解我哋推出產品推出得咁慢。

翻返嚟:今次想將 Refresh 嘅利潤捐出去,因為我一直都覺得,有時大家都想為世界為香港做啲嘢但又唔知點做好(至少我會),我想搵個方法令自己成為當中嘅橋梁去幫大家用一個好簡單輕鬆而且令你冇任何嘢可以輸嘅方法去做。

你買一件 Refresh,我哋扣翻例如個樽、原料嗰啲錢,所有錢都會幫你捐出去,一蚊都真係唔會賺。你唔會令我發達,但係你亦都可以用一個好好嘅價錢得到一件好好嘅產品,而且本身係我嘅利潤嘅嗰部份,全部都捐出去。

人越大其實好容易越嚟越孤寒。好多人都係咁,以往學生嘅時候都唔會吝嗇嘅錢,但係現在出嚟做嘢之後反而開始計較了。當然人要生活,考慮多咗,壓力大咗,亦都有家庭壓力等等,或許係成長嘅表現。所以我就希望可以透過購物,喺消費者完全冇損失之下,以正常價格買返一件相等產品,可唔可以做到一啲公益嘅效果。試下吧。

呢件事亦都首次喺呢度公開,其他人係唔知,當係多謝你睇我嘅週記。

最新週記

0