fbpx

#032 關於 Elon Musk、Patagonia 及 The North Face(08/01/2023)

Ryan

m

Re Pillow Co. 週記

08/01/2023

個星期有啲日子好忙,煩鎖「濕碎」事好多,令到自己喺度忙於左搞右搞,Handle唔同嘅事(eg. 同銀行及一間外國布廠解決我哋滙唔到款過去問題、安裝簽到系統、製作一啲特別陳列掛飾於尖沙咀門市用、解決一啲製作新產品時遇到嘅問題、製造 Prototype(測試品)、準備 Refresh 包裝、交收一批做好的 Refresh 等)。好多各種事情要做,但無咩做到啲咩大事。

講開新產品。想少少「抱怨」一句,要一手一腳由頭到尾研發一件市面上無嘅產品出來真係唔易,中途經歷好多失敗,會遇到各種問題同困難,要將佢一一解決唔易。所以或者都係個公開秘密,大部分床上用品品牌其實都係搵供應商拎貨,輕輕做啲修改,再幫佢改過個名,寫廣告時寫到好似點樣有科研科學證據成份,就可以了。一做就幾十年都係咁的,香港同歐美都係咁。真正願意研究,改善產品嘅同行係有但好少。亦都也許係點解大家見床上用品無咩創新,近十幾二十年,下下都係「記憶棉太空枕」護頸護脊,羽絨被,100% XXX針全棉床品…… 

最近用咗一星期睇咗 Elon Musk 本書,嗰本近幾年大家行入書局一定見到,有佢張相喺封面嗰本。(By the way,本書唔錯,可以睇睇)當中喺頭幾頁寫咗一句,我睇下搵唔搵得返,內容大意係好多叻嘅人去哂做啲搵錢嘅嘢,例如金融、法律之類,無咩人願意做創新研究,令到我哋呢代人,呢十幾二十年,2000年打後,世界無咩創新。唔會話點樣做創新好高尚好高人一等,但確實如果人類想繼續進步,總有人需要做呢啲事,唔可以人人走精面,諗各種方法搵錢,又或者淨係花時間研究點樣令其他人Click落自己個廣告,睇自己嘅 YouTube Channel 呢啲,所謂呢家好興講嘅「流量密碼」。

(圖:找到,Elon Musk 講關於創新一頁)

最近亦都睇咗 Patagonia 同 The North Face 故事,對我嚟講係好感動。我大概喺度概括一下:呢兩間戶外服飾公司源於兩個好鍾意爬山嘅朋友,Chuinard(Founded Patagonia)同 Tompkins(Founded The North Face),佢哋對大自然嘅熱愛,令到佢哋開始製作戶外用品比自己同有共同興趣嘅人用,然後當佢哋發展出去,環保一直都係佢哋嘅核心價值,尤其 Chuinard 更試過因為環保原因,一日內咗佢哋公司最好賣嘅產品,當時嗰件產品係佔咗公司總銷量70%。可以見到其實佢做嘅嘢係絕對唔係為咗宣傳,係真心相信環保價值。

每一日都有新嘅公司誕生亦有公司倒閉,我哋亦都唔會例外。我想襯住可以試嘅日子,持守我哋嘅價值。我哋會有我哋自己做事嘅方法,我哋會堅持好產品,同埋我哋會希望可為地球帶嚟正面影響。

最新週記

0