#033 最後一篇在舊網站寫的週記（15/01/2023）

（圖：設計新網站時，曾經諗過將週記嗰句「金句」整喺每篇週記嘅 Background 到，亦都真係做過出嚟㗎！不過個問題係去到手機版嘅時候就會因為畫面太細，同正文重疊， 所以我諗我最後都唔會咁做）

歡迎大家來睇今個星期嘅週記！ 今個星期我只係做一件事就係整新網站。 或者比較熟悉我嘅人會知道，我自細都好鍾意電腦，中一二嘅時候自己自學寫咗個 app（雖然只係一個功能同介面都好簡陋，計BMI嘅計數機……）， 而且仲係基本上抄住本參考書，Step by Step 跟住寫，但總算係培養咗我好鍾意電腦嘅興趣（所以中學年年啲近視度數都砰砰聲咁加），加上我又唔鍾意社交嗰啲，鍾意自己困埋喺房對電腦…… 到依家都係，所以其實到依家所有網站都係自己整咁。

而其實大概3個月前我已經睇現時個網站唔順眼，因為佢係用一個叫 Shopify 嘅平台去整嘅，比起再之前我 2022 年 5 月嗰個自己整嘅無咁靚，而我覺得要繼續行落去， 一個自己重新整過嘅網站係非常重要。而且會喺未來要做某啲嘢嘅時候（我暫時唔會透露係啲咩！）會有用，因為現時網站個結構太多限制，之後應該會有問題。 情況就好似你想畫一幅名畫，但係而家你只係得支鉛筆，最好咁梗係拎返啲水彩，拎啲墨水，有多啲顏色俾你，咁你先可以發揮到。

我呢個星期每一日就係坐喺電腦前面，十三四個鐘做呢件事。其實我本身好 enjoy 做網站的，但都真係有啲辛苦有啲悶。新網站應該未來一星期會登場了，比啲圖大家睇！