#153 只要找對地方（11/05/2025）

圖：小小心意。

最近嘅市場，確實係靜 。好多前輩曾經同我講過以前過去 2010-2022 年嘅光境，話當時如何生意係相對易做（依個世界無「完全易做」嘅生意，否則個個都係李嘉誠 ），依家真係唔知啲人去哂邊、啲錢亦都唔再好似以前咁買嘢 。有一位床褥品牌嘅老細同我講，其實好多人歸咎北上消費或者遊客現時手緊咗 —— 依一切都唔係原因 。按佢睇法，現時問題原因係 —— 樓市跌 。啲人閒閒地層樓唔見咗30%走唔甩，自然心入面唔好過唔舒服，因此洗費都手緊咗 。對比以前，人購買時潛意識覺得自己層樓都一路升緊幫佢賺緊錢，自然相對消費時都鬆手啲 。 

佢有佢合理嘅理論 。 

當然我哋做人唔能夠話埋怨點解樓價唔好，點解唔可以一直人生順利到尾 —— 世事就係咁，我哋每一個人都只係世上一個小角色，只能一路行一路應接問題啦。我有時會覺得為何自己嘅路咁難行，但有時亦都會慶幸我自己由於一直都係行一條不容易嘅路，於是乎習慣咗反而不會有前輩嘅落差 --- 本來一直都係咁㗎啦，依個生意額同成本結構就係咁樣咁難去平衡，一直個要求都係要去到依個 Level 先可以生存，不能唔夠料或者公司 efficiency 唔夠，不能有浪費，做每一個決定不能錯得太緊要 --- 如果有錯，也要自己辛苦去頂咗佢。 

去到此刻，我仍然都係要咁樣做。 

但慶幸自己傻傻更更，當然也有遇到壞人埋身，但遇上的好人更多，有不同方面的貴人協助或者提供意見，點一點明條路。有時我諗大家有工作經驗都明白，有啲事情真係「獨學而無友，則孤陋而寡聞」，若然自己獨自做，「死銼爛銼」，但一直喺度摸索都係基本嘅嘢，係會困難好多。如果有一個有經驗嘅人去幫你，係會易啲。有時我有唔明唔識諗唔通之處，由一個有經驗嘅人點一點你，就好唔同啦。

最近做緊嘅事越來越多，難度亦都越來越升級，願大家一切安好。