#181 樂富裝修情況 Update 和小趣事（23/11/2025）

（樂富 Update）同大家 Update 下樂富新門市店舖情況，依家裝修去到最後裝置傢俬階段，應該都不會太耐，比多一兩星期，12月中左右應該可以開到。 

講起嚟有趣，話說大約10月時曾經估計樂富間舖11月中可以開到，所有 planning schedule 都係計劃好11月中（本身係定 11月12日）開，但當時我伯父曾經提過其實新曆 11 月都係「歲破月」，聽個名都知唔係好嘢，開張係不宜嘅，但我當時係無理，諗住可以早開到梗係早，無理由裝修好擺喺度唔開張嘛...... 

點知唔知點解今次開舖籌備過程中遇上各種平時都無嘅阻濟，例如有啲交商場嘅圖紙批完又改，改完又出現新問題需要再改，搞來搞去就無咗幾個星期，又例如喺準備要夠貨上面亦有問題，最近成日斷貨，咁唔夠貨亦係好難可以開張，最後開舖日期被逼延遲，居然係咁幫我哋避開咗 11月，非常神奇。因此，可能都係12月中開，實際日期未知，等我問下伯父請佢重新擇一日先。