關於 Re Pillow Co.

我叫梁禮恒,今年24歲,係一個好普通嘅後生仔。

小小背景:我屋企自從爺爺1950年代已經喺香港做床品,棉被枕頭樣樣都有,家族生意。睇睇我哋舊時店舖相片:

枕頭推薦香港-香港枕頭

店面外觀:左邊有棉被、枕頭、被袋、床單等。當時亦有租借裙褂服務。

依門家族生意至今喺香港已經60幾年,我可以話係床品世家嘅第三代。(但我哋並非大富大貴,只係小生意)

而本身我都無接觸依門生意,但以下依一件事,令我決定開始一個「枕頭計劃」,去尋找一個完美枕頭嘅旅程。

時間倒流上年一月。我仍對枕頭無特別認識之時……

源起:其實係時候要換枕頭… 但揀枕頭真係好煩…

疫情開始時,我正物色新枕頭,因為用開嘅枕頭好多時會令到我個肩頸位起身會「酸」。當時我行入百貨公司同商店,卻發現枕頭嘅款式實在好多,同一隻牌子,又可以有好幾款,唔同高度,唔同物料。而且依隻又有依樣好,嗰隻又有嗰樣好,好難揀。百貨公司嘅店員叫我瞓上去試吓,但每一款試得十幾廿秒,其實試唔到啲咩。

而喺市場上我搵到有兩個係類似嘅,但一個就唸咗啲,另一個就唔知點解,個填充好似唔係好夠,有啲矮。

呀,係,好多謝你花時間睇到呢度,因為根據網站數據,好少人撳入嚟呢一頁的。呢個年代的確冇人鐘意睇長文。

當時,我大概知道自己鍾意咩質感嘅枕頭,但實在搵唔到一個啱哂自己心水嘅枕頭。

如果你有試過去買枕頭嘅,你一定明我講咩。

市面上個個枕頭都話自己都舒服,唔通個個都舒服咩。我想講,唔係囉。

買又唔係唔得嘅,我都有諗過跟自己budget買一個就算,應該瞓瞓下都會慣。但又唔係咁想就咁就買個自己都麻麻地鍾意嘅枕頭……畢竟一個枕頭都可以用一段時間,都算係一種投資。

最後?

買枕頭依件事不了了之。我唔知你會唔會,但有時你會有一期突然好想買某啲嘢,會係咁狂睇嗰啲嘢,但最後無真係買,件事就咁擺低咗。

當時我就係咁擺低咗買枕頭,咁啱屋企有另一個舊枕頭又係扁扁地,我將兩個疊埋一齊瞓。

枕頭高度-枕頭選擇

我以為咁樣做之後,枕頭嘅事就可以告一段落,但原來依家先啱啱開始。

為何會有 Re Pillow

喺之後疊住枕頭瞓嘅嗰幾個月,可以話係我瞓得最差最差嘅一段時間。

我仲好記得我當時瞓得差時,會凌晨扎醒,個人會瞓唔返我直頭會坐起身開燈做嘢。

有時係一兩點,有時係四五點好早醒瞓唔返。係我手字係唔係幾靚…

瞓得唔好會精神差係真嘅,每晚瞓得唔好更大嘅影響係我連情緒同脾氣都差咗,係不自覺嘅,我只係覺得樣樣都唔如意。

後來先發現原來枕頭唔啱唔單止會頸酸,而且更加令個睡眠質素差,做每一樣嘢都有影響。

我同你講依啲係因為我切切實實經歷過,我知道半夜眼光光望住天花板嗰個好無助嘅感覺。

我唔想同樣事情發生喺你身上。

我亦都明白喺市面上揀一個好枕頭有幾難。

(如果我一早喺一月喺百貨公司買到個枕頭,就唔會發生以上所有事)

所以我決定開始一個「枕頭計劃」,去借助家族多年做床品嘅經驗,研究及製作一個舒適、耐用、而且仲係香港製造,生產過程透明,質素有保證嘅枕頭。

我知道依個唔會係容易,但我覺得依個係應該做嘅事。

尋找那完美枕頭

我首先去了解市面上唔同枕頭嘅物料,亦買咗好多唔同品牌唔同物料唔同種類嘅枕頭嚟試用同拆開研究。

羽絨枕頭

如果枕頭係有生命嘅話,佢哋一定好憎我,因為我謀殺咗好多個佢哋,嚟自唔同國家嘅,34個,準確啲講。

太空枕、記憶枕、珍珠枕、羽絨枕、透氣枕、人造纖維枕、酒店枕、護頸枕、竹炭枕….

我不斷研究,問唔同嘅人,上網睇其他公司做緊嘅嘢,買佢哋嘅產品,了解唔同枕頭物料優劣。

我可以大膽講一句,我試過哂市面嘅90%要枕頭,價錢比較貴嘅(過千),有啲係幾好。但價錢比較大眾化嘅,的確無一個可以同時舒適同耐用。

喺不斷研究之下,我搵到合適嘅物料,並且用一定份量比例去合成佢哋,製作出市面獨有的第一代 CloudPok™ 內芯,此乃 Re Pillow 之基礎。

後來,我又諗起自己同朋友都好鍾意喺床上面煲劇碌電話食嘢飲嘢,於是就諗點樣可以更加保護枕頭呢?

因為當我哋咁多嘢喺張床上面做,就好易會有意外整污糟。

另外枕頭用耐咗,人體睡眠時自然嘅汗水都可能會變成汗漬痴咗係個枕頭上面。

然後我終於搵到一隻物料 ——— NANOTEX®。

NANOTEX® 係一間全球首屈一指布料科技公司,1998年由美國加洲 UC Berkeley 大學前化學工程學系副系主任 Dr. David Soane 博士和一眾科學家成立,專於研究仿製自然界動物植物防水透氣表層及各項改變布料性能嘅納米技術。今日 NANOTEX® 係布料科技界頂尖嘅公司,專利技術用喺 Nike、Lululemon、Calvin Klein、Hermès等嘅大品牌。

我記得當時成本對於我嚟講,的確係好高,仲要簽各樣合作協議,將布料拎去送測等,但我覺得係值得。

一不做,二不休。呢個係屬於我嘅產品,要做就做到最好。

當時我仲同中學同學一齊做咗個實驗:

整個研究、選料、到生產測試品嘅過程,我都有同自己身邊嘅朋友分享,有時亦請朋友幫手試瞓我嘅測試品,做做下,身邊愈來愈多朋友有興趣,於是我開始小批量生產 Re Pillow 賣比佢哋。

後來,慢慢更多人覺得好好用,好過市面上嘅枕頭,於是朋友傳朋友,枕頭愈賣愈多。呢個就係 Re Pillow Co. 嘅故事。

去到首100個  Re Pillow 枕頭賣出後,我開始更認真去諗點樣做好依件事,發展落去。

小小願景

2021年8月,我推出第二代 Re Pillow 2,一個更進一步,更好的 Re Pillow,改善了初代的未盡之處。

現時,我嘅目標係想成立一個屬於我哋嘅高質素床品品牌,一個我會形容為「很冒險的夢」。

生於斯,長於斯,透過 Re Pillow Co.,我希望可以建立到一啲嘢留低比香港同下一代。

香港係個好特別嘅地方。甲級寫字樓背後,好多人喺依個地方,每一日都生活得好辛苦。香港嘅貧富懸殊,喺世界上都係出名地高。當然有好多理由導致咗依個問題,但其中一個頗大嘅原因,係香港偏向優待讀書好嘅人,而一般讀書麻麻嘅年輕人,其實往上流嘅路係非常難行。若然香港有多啲本地生產/實業公司,或可補完到依個貧富差距。因為生產唔單止要工人,而且仲有一系列中層職位如監工、產品研發、測試、銷售、廣告創意等等。依啲職位講求嘅係創意、努力、社會同人際觸覺,並唔需要高學歷,但亦可以有上流階梯同埋技術可隨時轉移去其他公司甚至外國,比到更多元職業選擇,改善到一班肯上進嘅人嘅生活。香港另一優勢係國際化同埋知識產權保障相對完善,做得好嘅產品,長遠可以以香港為基地,揚威海外,彌補過往「國際金融中心」帶來嘅社會階層懸殊問題。

如果你係都後生,我想親自同你講少少嘢:未來係屬於我哋嘅,我知道你依一刻可能覺得見唔到希望,但只要繼續堅持落去,我哋終有一日會去到更好嘅未來。我知道好老套好大道理,我都唔鍾意聽呢啲,但我哋一齊相信,真正相信,就會變真。呢個係屬於我哋嘅年代。今日唔係,聽日都會係。然後終有一日你同我會老,再新一代嘅後生會慢慢擔任社會嘅要職,我哋亦都會退落嚟,時代巨輪會不停轉,長江後浪推前浪。

Re,有重新、改革之意。我相信我哋只要一齊,喺好多方面都可以帶嚟改變。

呢個,係屬於我哋呢一代嘅年代。唔好放棄。

多謝屋企人,如果你哋睇緊嘅話,我雖然好少講嘢,但想講其實我好鍾意你哋。

創辦人梁禮恒

枕頭推薦-枕頭香港

2021年8月2日

呢個枕頭,係我花咗好多時間研究嘅結果,如果可以,按下面個掣去了解一下:

 按此了解 Re Pillow 2

Re Pillow Co. 重視的價值

  1. 社群:Re Pillow Co. 視我們為同一社群。Re Pillow Co. 不是一間床上用品公司,而是一個屬於相信夢想的社群。
  2. 真誠:我們就是自己的產品每日用家,我們每日都會想我們自己想要甚麼床上用品產品, 然後去實踐,將它們化成現實。
  3. 願景:無論做甚麼,要忠於自己的願景和尊重他人的決定。我們是要將概念轉化為現實。世上並沒有太遙不可及的目標,亦無太微不足道的理想。

後記:相信睇到呢到嘅你,都應該感受到 Re Pillow Co. 同其他床上用品公司真係唔同。坦白講,是的。我哋真係唔想同佢哋一樣。我曾經自己喺市面上買過好多垃圾枕頭,呢一年我亦收到過好多客人講佢哋買過好多完全唔好用、一啲都唔舒服嘅枕頭、仲要好貴,我覺得呢件事好唔啱,成件事好錯。賺錢,唔緊要,但你收得個價錢你都要比返相應嘅質素。對於你嚟講可能係一單交易,係一個賺錢嘅機會,但對於客人嚟講,係佢每一晚嘅睡眠。我真係唔覺得咁樣係啱。我知道有其他公司睇緊,希望你哋都諗一諗。

我係一個幸運嘅細路,可以喺見到一個咁唔合理嘅市場下,有機會自己研究、生產一個真係好,一個真係由用家角度出發嘅枕頭。感謝你睇到呢度,可能你會想試吓我嘅枕頭,可能你唔會,點都好,多謝你也曾經出現過喺 Re Pillow Co. 呢一場「很冒險的夢」。