出席 Hong Kong Smart Design Awards 頒獎典禮

（新床單獲獎）昨日出席 Hong Kong Smart Design Awards 頒獎典禮，新床單可以拎到個設計銅獎已經係對我一個年輕人好大鼓勵，多謝大會評審嘅肯定。問咗主辦大會，水晶獎座同埋得獎證書我特別訂多咗幾 Set，下星期二送貨時會送埋去尖沙咀、北角及將軍澳舖頭擺下。

在此，實在多謝大家嘅支持，令到我一個如此普通嘅年輕人可以有機會試吓將一個 concept 去實踐出嚟。或者可能有啲依個 page 嘅讀者/客人都知，我好鍾意睇書亦都好欣賞如同 Steve Jobs、Elon Musk、Walt Disney、James Dyson、Bill Gates 等真係改變世界嘅人，雖然當然我依啲「小設計」都唔係咩發明，更加唔係咩偉大，但收到客人返嚟嘅讚賞同認同，覺得自己設計嘅產品，那怕只係小小咁能夠改善到人生活，係真係最令人鼓舞。

不過做人做事，不能輕易自滿，要謙虛、認真、沉潛內斂、刻苦，繼續前行進步。其實從商之後，漸覺其實一間公司要兼顧的實在很多，尤其如果你係想好認真、長遠去做。就以今次得獎嘅新床單為例 ———  香港床褥尺寸甚多，而不同人對於床單款式要求亦可以極不同，款式要多，可能要十幾二十款床面（還在一直更新中） 。我哋現時有13款尺寸，每個尺寸有十幾個款式，Total 200 幾款產品，要如何去管理咁多種不同貨品，而又要盡可能減少斷貨，又盡量按銷量分配不同門市，其實係一個好困難嘅任務 。好似我睇過早年黎智英做 Giordano 時期寫嘅商業書，提到「做零售就係一個同庫存搏鬥嘅遊戲」，確實就係咁  。但我可以說的是 2025 年的我在這方面是比 2024 年大有進步，但仍在努力中 。又或者好似依頭半年我哋都嘗試摸索，先後喺元朗千色以及沙田一田擺期間限定攤位一段時間，試吓接觸多啲人，亦都剛剛加入嘅日本Coronya® 麵包貓聯乘系列，其實都係想試吓將新床單可以更加入屋，我想多啲人可以試下我哋嘅產品，我想試吓令 Re Pillow Co. 可以多啲人識，產品可以更入主流。

長路漫漫，感謝過去幾年大家一直相伴 。未來肯定係唔易，可能會甚至好困難，但我會做好我嗰部份，不徐不疾，繼續努力 。