#165 與幾位規模更大的老闆/ Founder見面，舖頭應否要「跑數」？（03/08/2025）

今個星期喺朋友介紹下，有機會與一啲其他香港品牌的老闆/ Founder 見面飲杯嘢傾下計。當日見到嘅朋友，都係全部都係我嘅前輩同生意規模等都好多係我之上，因此好多嘢其實學到：公司管理、人與人之間嘅紛爭解決、公司開店商場策略、網上與門市之間嘅平衡和互動、分店數量多少和生意的關係…… 當中對於我咁嘅「新手」來講真係學到好多嘢，當日不少前輩其實都係做咗十年左右，但已喺佢其行業中我覺得係相對已企穩有自己嘅地位。而我當然仍然只係傻傻更更蠢蠢豬豬咁啦。

實際當日傾談內容無法全部公開，但當中一樣嘢我都想反思嘅係當日大家傾到一件事：「銷售目標」。似乎喺有一定規模嘅零售連鎖店，不需好多但可能大約10間以上嘅，佢哋都會比銷售目標比自己門市以及門市同事，而依一樣係我暫時沒有的。當然，關於銷售目標依樣嘢似乎每間公司老闆嘅做法都好唔同，有啲係都幾 CHUR 係去到如果新請返嚟嘅同事銷售一直平平，或者未有其他舖嘅同事咁好，就會基本上唔可以留低。我聽到當時都係有啲驚訝，但諗落又好似可能係常見而合理做法。我哋其實出街去買嘢食嘢好多大公司連鎖店，嗰啲店員其實之所以可能我哋睇落做得幾好，背後除咗訓練之外，應該一定有啲懲罰機制在背後，也都會有一啲一層層嘅管理，先可以確保到事情唔會走樣也唔會令到欠缺管理。當分店同人一開始多時，就無法可以話好自由無壓力咁。但到底「捽數」力度要去到幾大，依個就係確實要按情況去考慮。尤其係如果我要喺本身無 Sales Target、無數要跑嘅情況下想要加入依類嘅制度，同事會有咩反應？

但不過又要話說回來，舖頭嘅同事現時確實好多都係好叻嘅人，會有自己識主動自發會努力做，其實未必用得上以上嘅跑數依啲招數。慶幸係同事其實好多都好主動，自己幫手做多啲甚至可以話係做好多「份外事」，幫輕我嘅工作，其實我看在眼內都係知道。因此我想可以的話，比多啲自由度啦，到返轉，自己返工，都唔想老細成日管住哂又要比壓力，己所不欲，勿施予人嘅道理也。

但好似當日問過不同老闆，有數要跑又或者有啲銷售目標想要舖頭達到係好正常亦都係常見，當然都可以係好簡單嘅，比個目標，做到就請全公司一齊去食自助餐，做唔到就都無罰則嘅都可以。但實際點做，我諗到時我再諗吧。下星期再見！