#168 幾個得著（24/08/2025）

畢業離開校園之後，由校園去到經營一盤生意，幾年係一個令人急速成長嘅過程。而依個過程係痛苦但亦係回頭看係值得的。以下係幾個得著

1. 慢慢會發現其實人生係充滿不同嘅順逆，而錯誤係無可避免亦都係必經嘅過程。而我哋生而為人嘅任務就係只係要盡可能盡量喺錯誤中汲取一啲經驗從而去減少下次可能重犯相同錯誤嘅機會。而如果想去嘗試去努力「避免犯錯」係無可能亦都係一個不設實際嘅做法。
2. 好多時候做嘢，人多嘅做法唔一定係啱，而少人做嘅做法亦唔一定係錯 —— 甚至可能係有少少一個趨向係多數其他人覺得唔得，覺得錯誤嘅決定可能係對你最好嘅決定，而人多嘅決定相反可能係錯。
3. 事情在順暢時會覺得一切理所當然，但當有不順暢時，就會至發現原來之前嘅順暢係非必然。
4. 之所以會因為一件小事擺喺心放唔低，係因為自己人生仍然未開始做大事，因此一件小事就會對自己好重要，覺得係好大件事。就好似可能一個婆仔可能會為自己買嘢買貴咗$20諗全日，或更甚要間舖退款，但一個做大事、管理大團隊大公司嘅人係唔會。一個人去care依啲細事係因為自己無大事care，欠缺大局觀。
5. 每個人都會有啲自己獨有嘅困難同生活中每日面對緊嘅問題，係都有待去解決。世界唔會因為話：嘩，你都好慘喎，咁多負擔，幫你減輕啲啦 --- 因為每一個，係，每一個人都有依啲問題的。當慢慢見嘅人多咗，會發現其實每個人都有自己面對緊嘅獨有問題，只有佢自己先知。即使你見到好似生活安康，一切唔錯嘅人都係，佢生活都有問題。世界逼我哋每一個人成長。
6. 依個世上大部分人都係唔太享受/鍾意自己嘅工作。根據 Gallup 2023 調查，全球大約 7成7日都不投入於同喜歡自己嘅工作，亦即大部分人其實都係唔係 100% 投入同喜歡自己做嘅嘢，難怪好多我哋日用嘅產品/服務都唔係最好。