有位工作生活已上了軌道，也是做生意的前輩（Uncle）曾經講過，自己很後悔年輕時無多做工作上的紀錄，無影低多啲後生時初初創自己做生意嘅事，例如當中一個係自己喺一個無窗、只係有40呎嘅工廈 office工作咗一段時間，嗰啲當時唔想比人知道自己公司係咁一人規模，好怕人哋可能會想上嚟傾嘢嘅點滴，無留多啲紀錄，因為當依家睇返轉頭，依一切其實都係寶貴回憶，亦都睇返轉頭，原來自己行咗咁遠。
因此依家我都係寫多啲紀錄好啲，有啲嘢即使可能之後睇返覺得自己當時諗法好蠢，但畢竟都係真實嘅紀錄，我覺得都係值得寫下。
最近喺出新款時遇到一啲阻滯，生產上有延遲，依啲事情係會一件牽連另一件事，以致最近有多出啲時間，依啲情況我覺得從管理上係唔理想的，因為咁樣代表之後其他時間會忙到癲，會啲嘢到時就會迫埋一齊好辛苦。依一兩年我有個體會係通常如果覺得最近啲事情好似幾順暢，或者覺得可能好得閒，就會代表有嘢做錯。之後一定會出事要警覺，而相反就係當覺得事情好差好差，好忙好多煩惱好多好麻煩，好難解決事情全部谷埋一齊好辛苦，好想放棄，就代表之後就會好轉 -- 而人就係喺中間處度遊走。
但先講返主題先，以上講嘅一時忙一時空閒係唔好的，因為從管理上，我希望事情係平均地忙，咁樣不論係同事定生產定後面管理同計劃，都係可以以一個穩定嘅速度去做，因為當一堆嘢埋埋急住做，一定會有問題：可能係舖頭同事會一忙係做得會差咗，客人會唔鍾意，然後會可能投訴，然後就會亦都有依啲投訴要處理，而同時當生產方面突然忙，自然做嘅產品出嚟因為趕時間，可能會做錯，又可能做出來手工會無咁靚，而變咗又會衍生出新嘅問題要處理。以上講咗忙錄時候有咩唔好，而相反得閒都會有唔好的，如果同事得閒，可能會開始擔心公司前景，會諗係唔係公司生意開始差，無生意，係唔要係時候要轉工... 又至於在產品出品方面，如果得閒就即係生產線坐哂喺度，咁又誰人去出糧比佢哋... 都係有問題。因此，盡可能係要安排到事情係工作量平均啲分佈喺唔同時間係最好。其實依個係喺人生都係咁，如果一堆嘢同時間發生，係好難處理（例如假設一個人同時出現要搬屋、轉工、結婚），係會喺時間上同生活適應上都會好困難，因此最好依啲可以的話要分開一單單，隔開少少時間來做，因為 touch wood 有時可能中間仲會有啲突發事情發生（e.g. 家中壞熱水爐、身體出事等等） 依啲看似好未必常發生嘅事，係絕對有可能發生。由於依啲事情係無法去預計同控制嘅，咁我哋盡量就先將我哋控制到嘅，例如搬屋、結婚嗰啲，盡量攤一攤開分開時間嚟做，一單一單處理，比到自己有空間可以應接突然有突發事來，都可以應付到。
同樣其實經營一盤生意亦如上，做法接近，不過就除咗諗自己仲要多啲諗埋人哋，同埋多一個要求：「唔可以得閒」—— 得閒代表公司有 wasted resources，有啲位置未做得夠有效率。喺唔少嘅大公司係會有依啲情況，啲位係有啲人得閒，其實佢哋係有少少係無需要喺度。我嘅睇法係咁嘅：如果與其有一啲人日日做到忙到狗咁，但又有一個人日日好得閒返工等放工，一係就要依個冗員去幫手幫其他咁辛苦嘅同事，如果佢唔願意幫，就要將依一個冗員 Cut 咗佢，將佢嘅人工分比其他辛苦努力工作嘅同事！亦係我想做到，5 個人做 10 個人嘅嘢，出 8 個人嘅糧，因為咁樣先係真正從件事大局去睇，係對所有人都好。喺我嘅情況，由於我係因為背景始終同家族床品生意有啲關係，因此都其實有遇到依啲問題，但已漸漸解決中。係㗎，講咗要寫工作紀錄係好真實，我係會寫得好到肉，因為我想真係件事好，辛苦努力嘅人其實係要值得係要可以加人工，而唔努力真係不應該留低。
講多另一樣關於不能得閒嘅事，如果因為一啲突發事而多出時間，空閒，應該點好。我今次就拎咗啲時間去做一個 Barcode 嘅 system，以及去做啲再之後需要嘅事，因為事源其實一直以來我哋出貨都係靠人眼去認貨，係有時總係會錯，同埋隨住款式越來越多，要有一個 barcode system 好似超市咁，喺舖頭 嘟嘟嘟 ，同事過機係會快好多，唔洗再喺個Pad度撳撳撳，亦都唔會咁易喺舖比錯貨啲客，依個係善用 operations 上嘅空閒。同時亦都開始比一啲早期留咗資料，希望訂造特殊新床單尺寸嘅客，去以獨立邀請去開始去試下做訂造，去善用生產上嘅空閒，同埋亦都去試下執行上會唔會有困難嘅問題等等，去準備定下一步有可能可以公開訂造計劃比公眾人士去使用。
管理依個大學問，我只係初哥，不過以上係作為紀錄，寫寫最近做啲咩。
#166 進入主流市場的思考（10/08/2025）
#168 幾個得著（24/08/2025）