#223 不同時間不同人有不同想法（13/09/2026）

圖：寫到第200幾篇後，今星期決定將週記擺埋返 main menu。之前唔擺嘅原因係因為怕人睇到自己內心嘅感受，亦都擔心自己不會堅持一週一篇堅持到落去。現在唔怕。暫時擺出嚟一陣。

唔同時候睇一件事會有唔同睇法。最近聽咗一個訪談，嘉賓講到佢自己唔鍾意一個phrase叫做「被歲月磨平咗棱角」，佢反問到底是否永遠都非常倔，成日都開口埋口會得罪人就係代表「沒有被磨平棱角」 。佢認為咁樣反而代表你沒有成長，成長就係你學識明白唔同人佢嘅唔同情況同埋需要，並且學習點樣喺唔得罪人嘅情況底下同時達到自己想做嘅目的，搵到大家相處嘅方法。呢種圓潤啲嘅處事態度其實係佢角度嚟睇並唔係「磨平棱角」，反而係成熟的表現。我係同意的。我諗曾經以前我都會覺得，如果睇返開初嘅 Re Pillow，6年前我20出頭，我某程度上當時比現時更加多「棱角」（引用返呢個Term），慢慢做落你發現原來各人中有佢自己嘅因由同苦衷，以前有句說話叫「難為正邪定分界」我細個係聽唔明，超人同怪獸一正一邪，幫超人嘅係好人，幫怪獸嘅係壞人，為何會難為正邪定分界呢，只係人為咗 Justify 自己做嘅壞事罷了！

後來當然工作後就明白固中含意。以律師依個行業去舉例係最易的。律師佢有時受人之託都要去做一啲為盡自己客戶最大利益嘅事，佢沒有講大話，亦沒有指鹿為馬，但佢做嘅事，未必人人認同。咁又如何計數呢。又或者，有啲律師行係專門係幫大企業處理事務，有時有啲嘢係道理上係做得但仁義上未必講得過㗎，但又如何判斷誰對誰錯，或者嗰啲律師行背後有啲同事全家係得佢一個工作，上有高堂下有細路，要一個養8個，佢月月清月月都好辛苦，所以做依個工作，但是否又是一個壞人。

以上其實都係好顯淺易明，當然我自己個人係會避免擺自己喺依啲位置，因為我個人覺得盡量避免啦，世界已經夠多問題，盡可能喺人生在世短短幾十年做啲貢獻到社會嘅嘢，唔好下下只係諗「我想點」「自己想點」，更無謂做一啲害到人嘅事。但對於處於依啲位置嘅人，我係非常同情以及諒解的，我認為我哋沒有資格去批判人。正如所謂「不笑娼」一樣，有時我覺得其實香港人大家本身壓力都己好大，或者係咁網上仍有一個風氣太過 Judgemental，有時我覺得太多人對事情太有固定嘅諗法，其實又何必。不過依家社會風氣，有時人較為追求自我表達，亦都或者係咁「搶口」先「爆」，因此就係如此 。