要了解自己想點樣是很重要，隨住時間去行，做嘢耐咗，或者亦因香港本身亦是一個福地，我慢慢有一個睇法係你有好多方法去做事情，或者咁講甚至係可以話大家有好多方法去活出自己嘅人生，但需要喺決定時，要諗清楚自己做事會有咩嘅後果比自己同身邊嘅人。Re Pillow 係我嘅工作，係，但佢同時亦係一個比我嘗試試去做好一件事嘅地方。有好多方法我諗未必有啲人會咁做，但我會想堅持做好，原因係我想做到一啲真係我認為對嘅事。我唔認為工作係單純為錢，我認為人之所為人，係要活出一個有價值可成就到他人嘅人生。留意唔係成就自己，係要成就其他人。
奈何有時我用我最好嘅心去做，我發現總仍會有人未必滿意。其實依個亦無可厚非，人人都會有唔同嘅角度睇法，但有時有啲說話會好難聽，會令你覺得個心有啲頂住頂住，依啲事，尤其我哋係做所謂四方客生意，入嚟嘅人咩都有，亦唔係咩貴價產品，普羅大眾，一定有啲比較 Laymen 嘅人，有時佢哋唔係太識得表達自己情緒，講出一啲說話其實我都知道佢係無心，有時亦都大家傾完之後，其實我都 Feel 到佢係有啲後悔和歉意，但總當刻我會有啲唔開心，我亦其實無咩好講。我留意到比較受教養嘅人，佢哋會較為明事理，較為其實大家可以能夠講到深入啲嘅嘢，但有啲人真係唔係太能夠接受同佢想法唔同嘅人，佢覺得依個世界可能就係只係有佢一個諗法係啱，你有第啲諗法就係錯，咁係較為難相處。
例如我遇過有啲客係好認真用啲好難聽說話罵我，點解會出深色，點解唔係全部款式淺色，深色一定無人會鐘意，你識唔識㗎，你咁樣完全都無心做我生意，算吧啦，你XXX YYY，無嘢好講，你等執，根本你無心做。
但有時遇到依啲情況，我都想試吓傾吓，了解吓，睇下挽唔挽回到。但亦發現係唔易，即使你用最好嘅心去傾。佢可以都咬緊覺得佢係啱，佢唔信依個世界深色床單同樣有客覺得深啲襟污糟啲，唔想要淺色，佢覺得我老作啲例子想耍佢。有時會令我覺得個心有啲頂住頂住，因為我做咁多嘢，其實係想為佢好，而解釋落，亦對方無法明白，我係個心會有啲唔開心。依啲係一啲不愉快而無法排解嘅事，亦都無得同咩人講，只係自己知道。
我好崇尚一個「Vertical Integration」所謂垂直整合嘅運作模式，很多當然唔同嘅人想分銷我哋嘅產品或者擺上 XXXX 度賣，我都係唔做嘅，而只係做自己嘅銷售店同網站，其實個原因就係有好多，包括我想將本身分比依啲 Channel 嘅錢，直接可以回饋顧客，我亦唔信得過佢哋，會真心對我哋嘅客人好，亦都又佢哋隔一層，對客會否真係好。再加上其實如果認真諗一諗未來，D2C（Direct to Consumer）同直接對客係一個必然方向，科技以及通訊同運輸嘅方便，係會必然令到一啲實在嘅實物可以更快由生產帶到去客人手上，所以我為何係要由設計到製作產品到到銷售都要喺自己度完成，而成套系統係自己內部連接哂，而不是比貨邊度邊度賣，不是外判中間啲嘢，係因為我信依個係未來。呢個係最能夠可以將產品做好，並且可以貨真價實，真正將好產品交到去客人手上最好的方法。當然，我亦可能係錯。
其實我對於到底之後應該點行，我都有不同的諗法，今個星期我有一個比較清晰嘅睇法係其實我希望，若然可以能夠維持到現時我可以做到自己想運作嘅模式，係最好的。呢樣嘢唔係咁容易做到，我雖然自己從來冇正式返過工，未畢業之前已經自己做 Re Pillow，但都明白如果若然公司有機會不由我話事的話，又或者講我未必再有自由度，可能有好多嘢都做唔到。喺依家呢個情況，雖然或者留意得耐嘅人都知道我來自於一個家族的小床上用品的生意，是由我的爺爺開始做，叫 惠記 （有興趣的人可以睇睇 https://hkwaikee.com 係我幾年前幫屋企做嘅網站，我哋依啲小生意本身係冇公司網站的，但我都想幫佢整返個，為家族的歷史留低一啲紀錄），這個家族生意由我的親戚處理，但係都比到好多自由度我去做我自己嘅嘢，包括有好多決定可能佢哋未必同意或者佢以前唔係咁樣嘅做法，但容讓我去做，容讓我去自己摸索自己嘅路。
例如好似最近今個星期同一啲慈善團體去傾一啲合作，呢啲做法係佢哋傳統老一輩覺得只係做自己部份未必本身會想到會做的，但我係想可以融入埋落自己的 Re Pillow 入面，希望能夠真的傾得成，亦都多謝屋企的親戚佢哋比好多自由度我。
#225 太早擴展不是好事（27/09/2026）