#232 翻看家族舊事、家族生意 80 年（15/11/2026）

圖：1950-60年代的興華街，紅箭嘴那間就是我家阿爺的排檔 惠記，賣柴炭同棉胎，服務附近街坊。興華街排檔早已清拆，「惠記」透過 Re Pillow Co. 仍然營業至今。Re Pillow 背後的註冊公司，仍是當年的惠記。

或者有啲人知道但有啲人未必知，其實我（Ryan）自爺爺起，家族是做小小的床上用品生意的，1946 年，我爺爺在依家長沙灣楓樹街球場嗰個位置賣柴炭，而依幾十年來，依個床上用品生意雖然說實話做得不太好，規模又細不高知名度而亦其實經歷幾次差點結業，但總算沒有斷過，一路行到今日，有幾多辛苦亦捱過去。依期翻睇一啲家族舊事，覺得當年嘅人真係好捱得。我爺爺住喺深水埗，早期我阿爺係會行路，由深水埗拎貨入去大埔賣，而賺係賺得少少。係行路入大埔。依家，有時我哋喺九龍，有時覺得搭車入大埔都覺得遠，講緊依家係有冷氣、有得坐、有電話你撳可以打發時間。而一間咁嘅小排檔，當時我爺仲要養活一家8個仔女，當然，我哋係比較窮，著到爛衫補完再補，但都叫捱到去，養到仔女成人。有時依家我哋可能諗小朋友，又諗要比錢去興趣班又上多兩個補習班又最好入名校甚至國際學校，於是又上啲面試班，又要講下希望可以遊戲學習愉快學習 --- 同當年真係好唔同。當年講嘅係會唔會餓死，或者當時二戰日本人打到嚟，唔好死...... 其實當年嘅人好捱得。

有時睇嘢用依啲 Perspective 去睇，會覺得依家面對任何事都好閒，至少喺香港，即使我做 Re Pillow 幾多困難，點頂住都唔會衰過當時阿爺年代咁難捱。至少香港唔會餓死，亦唔會無地方你去住，而失業率比世界各地，現時都係好低，基本上唔去揀工唔挑剔，總能有工作可以養得活自己。有時我做嘢時都好迷惘，我咁落去得唔得，年輕係咁。但睇返以前嘅人嘅事，其實都係同一個香港，尤其我依家住嘅地方其實距離圖中依度唔係好遠，亦都阿爺嘅年代幾十年，都唔係離依家好遠，用依個 Perspective 去睇，當時佢深水埗行入大埔都係咁，依家又有咩嘢係難。我哋已很幸福。

仲有一樣嘢我係睇爺爺舊事學到，正確嘅事就做，唔洗驚會得罪人。同樣如果一樣唔掂就再換第樣，一定要不斷變不斷去做。努力。功夫做唔哂就凌晨三點起身做（最後依句是阿嫲嘅舊事度學的）。