進入社會數年，漸覺世事往往係「你睇我好，我睇你好」。每一個人或多或少總有自己面對嘅問題，工作上有，私人生活上都有 。我有，你都有自己面對緊嘅問題。今個星期有同一啲做床褥品牌嘅朋友傾開，係一講出來，大家就會識嘅床褥牌子，就好能顯出以上嘅道理 。我睇佢哋好，佢睇我哋好 。實情係大家喺不同階段，工作上面對不同嘅困難而已，沒有邊個人係活得完全無憂無慮，會完全無困難的 。你以為佢活得好好，公司規模又大又知名，但背後可能佢有好大壓力，一唔留心投資者就截住水喉佢就當場企喺度 。同樣你以為做細嘅公司就好，但背後可能佢搬搬抬抬咩都親手落手落腳做，最後老闆搵嘅人工都係一萬幾千，仲低過普通文職 。所以各有各困難 。
但工作往往最辛苦嘅位置係你無法停落嚟 ——— 你要麼繼續做，要麼就會被淘汰…… 我都有一個喜好係會睇不同人嘅成功失敗，因為係總係會學到嘢的 。於是你還是夾硬谷自己，唯有信明天會更好、總有出頭天的之類說話，說到自己也不知道是真，還是只是說來哄哄自己的謊言 。但當然困難不只是「做」咁簡單，而係逼於成長 。
關於逼於成長
我其實有時依然覺得自己仍是一個好年輕、初初畢業出來工作嘅年輕人，年輕嘅好係你可以犯錯，可以「重頭嚟過」 ，但現實係我已不再是能夠輕狂 。年紀上雖然係 27，但我不能話掉低工作，下個禮拜去西藏行山行一個月 。亦因工作嘅無情係佢唔會理會你本身有咩困難或者有幾年輕，工作嘅難度係唔會就住嚟比你 。你嘅任務就係要解決咗啲問題佢 —— 就係咁 。因此我面臨一種被「迫於成長」嘅感覺 。
情況就好似你不嬲都唔識點煮西班牙菜，冇煮過亦都唔識整，你突然收到一個任務，聽晚你要煮一個八位用嘅西班牙餐，由前菜去到甜品一手包辦 。而且有限 Budget。
做得好，就可以去下一關，做唔好，就以後都唔使再見 。 而有時個困難位係你往往會受到質疑，令到你都會覺得咁辛苦會係為咩...... 太多的不理解以及太高嘅難度係會令人想放棄。但都係要照樣繼續做。直到去到有人開始認同之日。
我發現香港有一個現象，係每次當有一啲新人做一啲新嘢，開頭大家都係比較鼓勵同埋正面，然後假設佢做得開始進入主流啲嘅時候，即使你幾用心做，就會有人批評同質疑，如果直頭做成主流時，仲會更多批評。當中比較經典嘅例子就有 試當真 YouTube Channel 以及 Casetify 手機殼，而如果世界性嚟講，TESLA、Apple、小米其實都係如此。往往喺成長，進入緊主流嘅階段係好難。要解決這個問題其實只有兩個方法，第一，永遠不進入主流，繼續只係細細地做。第二就係捱過去，專心做好自己，然後就會好一啲。
願我依段路程可以暢順一啲。
Ryan
新床單獲得 Hong Kong Smart Design Awards 設計獎