#150 沙田一田 Pop-up Roadshow 期間限定店（20/04/2025）

首先要多謝所有同事，尤其在沙田一田駐守的同事，這段時期大家都辛苦了 。

初初開始做生意的時候，曾經有前輩跟我說要好好享受現時剛剛起步開始、創業的時光，因為呢段經歷只會經過一次 。我當時唔明白佢嘅意思，我反而覺得我好想快啲好似前輩咁，好似坐擁一個相當唔錯的社會地位同埋一盤生意，有眾多分店，有很好嘅知名度、名氣 ，生意額又大…… 當時嘅我初初開始，做緊幾百幾千蚊嘅生意，有什麼好呢？有什麼好享受呢？我唔明白。

後來做咗幾年，我諗我開始慢慢明白當日前輩講嘅說話。有一句話叫做「你睇人好，人睇你好」，我亦都唔會講嗰啲「錢係無用」嗰啲咁鬼作狀嘅說話，但無可否認隨着生意規模大少少，就好似我本身只是管理一個網站商店，去到現時有數間門市… 其實亦都確實係問題越來越多 。包括人事、管理、同事之間可能有爭執、庫存管理…… 等等等等 。成本隨着規模增加而上升，其實扣除出糧租金等等，煩惱肯定是多了，工作量肯定是多了，但錢未必有多。

我有一些做生意的朋友，大概大家年紀差唔多或者比我大，佢哋面對這些以上可以話係一啲「生意擴展時遇到的更多煩惱」嘅解決方法就係他們決定維持現時的規模 。將工作上賺到嘅錢自己放埋一邊，然後開始大約維持住咁上下的生意規模便是。確實這件事情冇話對錯，某程度上，其實咁樣或許是一個更加舒服，以及理性嘅決定 …… 我都會覺得自己在搞啲乜，人之常情好合理 。不過我知道我自己性格，想繼續做落去，想試吓繼續努力，冇錯，可能會輸晒，但至少想試一試，香港的失業率不高，我自己也不是傻仔，即使失敗，應該不會餓死 。

於是，今個星期起決定一連三個半星期，在沙田一田擺 Pop-up Roadshow 期間限定店，試吓接觸多啲人，試吓跳出本身的框框。最後真的要再次多謝所有同事，尤其在沙田一田駐守的同事，這段時期大家都辛苦了 。