耐不久都會有客人問，點解我哋新床單其他都係淨色，但唯獨有同 Dustykid 做聯乘，係咪有啲咩特別原因，其實無大家諗得咁複雜……. 個合作原因好簡單又帶點任性，因為我自己本身鍾意 Dustykid 。
喺唔夠10年之前，我係一個喺沙田讀書嘅正常中學生，即係戴眼鏡、薯下薯下，行過都唔會望多眼嗰種，唔打波唔高大唔靚仔，當時有跟一位叫 YY Lam 嘅中文老師補習，而曾經有一年（如果你同我差唔多年紀又補過 YY Lam 應該知 — 暴露年齡系列） 上堂派過啲 Dustykid 鼓勵語句卡仔，就此就認識咗 Dustykid。嗰一刻 —— 老老實實嘅，睇都無睇過張卡就放入書包，嚟補習姐，依啲乜鬼「鼓勵卡」唔會幫到我考試，咪掉埋一邊 。
但係嗰陣時嘅 Dustykid 卡仔，佢做到個尺寸好適合攞嚟做書籤，結果溫書讀書時拎哂嚟當書籤用，而當然溫書溫到唔想溫嘅時候，就好似小時候上廁所做大事，無事做時會拎支洗頭水反轉後面來睇成份一樣，溫書悶起上嚟就開始閱讀 Dustykid 卡仔上面寫嘅語句，就係咁漸漸愛上咗 Dustykid。
當然後來佢哋在上環開了茶飲店又去幫襯、亦有當中這些年來一定有買過佢哋嘅 T-shirt 或其他產品等 。因此當我知道 Re Pillow Co. 下一步有機會可以做卡通聯成嘅時候，就搵咗佢哋，其實就係咁簡單 。
最後幫佢哋又幫自己賣個廣告，我哋嘅 Dustykid 聯乘系列各款顏色尺碼都有陸續補貨，在門市同埋網上都現貨供應，另外 Dustykid 團隊亦都喺佢哋嘅荃灣 Office 依家擺緊一個「休息展」，同大家探討休息話題，也有佢哋不同產品出售，包括我們嘅 Dustykid 聯乘系列 新床單和新被袋，大家都可以去睇吓㗎！
Dustykid x Re Pillow Co. 聯乘系列：repillow.co/dustykid
#150 沙田一田 Pop-up Roadshow 期間限定店（20/04/2025）