#149 給未來的自己（13/04/2025）

今日星期日自己一個下晝返公司做嘢，星期日公司當然只係有我一個返，做嘢嘅時候，用到一隻好耐冇拎起嘅USB，因為搵唔到平時用開嗰幾隻，咁啱插入電腦見到啲舊相片，係早三年一班同事上嚟公司食pizza 。

有時當工作忙忙忙時，有啲嘢係冇咗。譬如同一班同事一齊玩嘅時間 。曾經 Re Pillow 只有一間舖叫「太古城體驗館」嘅時候 ，大概係2022年，當時我曾經同同事許下諾言，講我哋每個月要搞一次同事活動，可能係一齊食pizza、可能係一齊去行山、可能係一齊去打war game…… 可怕嘅係當工作忙忙忙嘅時候，最後依一切只做了幾次，隨著產品增加、門市分店增加，我自己工作量亦不斷增加，「問題天天都多」，昔日諾言在偉大嘅工作面前，灰飛煙滅 。

有次我落尖沙咀舖頭做啲嘢，尖沙咀嗰個同事Fanny（如果有去過尖沙咀應該有見過佢）同我講笑咁講，喺Facebook見我拍啲片仲多過我真人…… 可怕嘅係，佢講嘅係真，而我有時覺得，同事其實好錫我（希望大家都錫佢哋），面對一班咁好嘅同事，我卻埋首工作，對佢哋，我有所虧欠 。

因此偷偷喺度寫下諾言（因為知道依度無人睇），我會再努力啲去做好佢 。