#024 咩都有啲嘅一週（13/11/2022）

歡迎大家來到閱讀本週週記，繼續由我同大家方享每週工作大小事。

1. Re Pillow Co. 正式註冊商標

是這樣的，其實一直以嚟 Re Pillow 嘅 logo 都係未有注冊商標，亦都即係話，喺今個星期之前，其實任何人都可以隨便拎 Re Pillow 個 logo 貼上自己嘅產品嚟賣，我都係奈你唔何的。不過今個星期開始大家就唔可以咁做， 因為商標已經註冊，我哋依家係 Re Pillow Co.® 了。

2. 新店裝修

如果睇過 #021 或者再早期幾個月之前嘅週記可能知道，我哋正準備緊一間新店，今個星期裝修亦有新進展，帶大家睇睇：

大概已有個「廊」了。新店商場人流就唔多，不過地點方便，新舖面積亦大過現時太古，會可以放多啲產品出嚟大家試試，亦可以多張床用。

3. Support 售後支援網站

事源雖然絕大部份客人都可以輕易按喜好調整合適枕頭高度，但有時亦有客人查詢點樣較一個完美啱自己嘅枕頭高度。因此，我哋今個星期推出咗Support 售後支援網站（https://support.repillow.co），上面有一啲常見使用枕頭嘅疑問解答，例如點較啱自己嘅枕頭高度、清洗詳細指引、保養方法等等。Support 售後支援網站會比包裝內嘅說明書更為詳細，如果客人有需要時亦可以參考。

最重要嘅說明已喺說明書上，Support 售後支援網站會係輔助。

4. 新產品研發進度

其實近大半年，我哋都喺度研發緊新物料改善產品。而依個產品雖暫時仍未推出，但相信明年初有機會推出。現時有部份全新研發嘅材料（過去已花好多時間研究同各國公司一同合力做）已經做好。今個星期開始托 SGS 做各樣嘅品質測試，如果一切順利，就會未來一兩個月運來香港，然後配合埋其他嘅不同原料，就可以做出我哋嘅新產品。

我自己好期待！希望可以快啲到時比大家感受。

5. 結語

喺香港做「實業」 確實係非常愚蠢，吃力不討好。不過真係做得開心，因為係自己喜歡嘅事情，所以會繼續做落去。

最近睇咗 MM YouTube 「永樂粉麵廠」 一集（Link：https://www.youtube.com/watch?v=k_wx-U8k-Dw），見到佢哋一樣好努力咁去嘗試「傳承」同埋「活化」一啲可能一啲比較老一代人嘅產品同工業，再見到佢哋做得辛苦同開心，其實感覺有啲似我哋。當然，規模來講，佢大我哋好多好多：我哋Office 得兩三個人，佢哋受訪都有5、6個，加上佢哋除咗賣比一般客人之外，亦都批發埋比唔同餐廳，工廠仲行24小時輪班制，生意比我哋大規模好多。

雖然大家其實唔同行，但可能因為大家都係家族生意，香港設廠生產，唔知點解睇到佢哋，好似見到自己喺呢條路上唔係孤單，好似見到原來香港仲有人做啲同呢個城市主流唔一樣嘅事。

近來好多人移民，我身邊朋友都走下走下又無咗啲，大家雖然話有機會再見但心入面都知道現實係點。慢慢個人自己都有時好感性，呃唔到自己，其實個人真係無以前開心。好似整體香港人都係咁，看似好多新娛樂，但大家靜落嚟，其實唔開心。

寫緊呢篇文時其實已是夜深，開始太眼瞓唔知自己寫緊咩，大家都要加油。