#221 睇咗 Re Pillow 好耐（30/08/2026）

喺依度睇得耐嘅朋友或者知道，我雖然日常工作多，但我仍很堅持每週會寫一啲工作紀錄，不是為咩而是係想真的留一啲記錄同一啲當時自己嘅諗法，因為我相信之後好多年後睇返會好有意思。如果到到最後係公司失敗要倒閉離場，亦是一個曾經努力過、狂妄青春嘅記錄。如果到時未洗執，還可以小小地做下，咁亦係一個一步步走來嘅印證。

今個星期都有客同我講，真係睇咗 Re Pillow 好耐，雖然之前從無買過嘢，但真係由好初期齋有個枕頭起睇到依家，當然亦都一定有一定程度客氣說話，但我亦都係好多謝佢的。我知道其實好多人喺香港其實都或者有時工作上未必係開心，能夠見到有人似乎可以做到自己想做嘅事而唔洗死，係屬於奇事...... 先講我生活係相當普通到不之得了亦都我想講如果再可揀多次我諗我唔會揀同一條路做依件事（但亦有啲年長啲嘅前輩同我講我咁樣講法純粹係出於我以前未打過工，未知道其實打工都一樣有一啲差唔多衰嘅嘢，不是因為自己做嘢先有，對此我亦 compare 唔到無法判斷），所以我其實覺得自己咩都唔係，只有一樣嘢係，就係可以好啲。太多需要改善的事，我諗只係玩 Build Up 依個 Re Pillow，已經可以夠我玩好多年，因為做極都會有位可以改善，總有啲嘢有時睇住自己嘅產品/網站/出現問題要解決 等等，做極都仲有，e.g. 大家今個星期睇個 Website Header 都唔同咗，而其實不單止係 Style 唔同咗，依家個 Shopping Cart 有個 logic flow ，會睇會唔會客人買嘅 Base 同 Top Sheet 唔小心撳錯，底面尺寸唔配，或者第一次買床單唔記得咗買 Base，會比個小小嘅 Reminder 比個客，避免落錯單...... 依啲嘅小改良，我其實一直想做，不過未有機會。又例如 Re 仔依家直接接駁我哋嘅生產系統，佢可以答到如果有啲貨斷緊貨嘅，佢可以直接入生產系統去 Check 埋生產進度，幾時會補貨。之後我更想佢可以連接埋我哋嘅積分系統，可以幫埋客去處理積分問題。（依家Re 仔已經頗 Powerful，訂單嘅嘢已做到好多，但我信仍有好多可以做。）有好多嘢做，有好多嘢需要做，但不能停落嚟。唯有最後堅持做好所有的人會勝利。