#026 產品研究：求知若飢，虛心若愚（27/11/2022）

歡迎來到本週週記！今個星期主要搞緊2件事：1）研究 Re Pillow 2 長期使用的保養方法與使用貼士；2）新產品研發、實驗

第一件事我喺網站嘅Blog https://repillow.co/blogs/news/re-pillow-長期使用保養小貼士 以及 FB / IG 度寫咗， 亦都拍咗段片講解一下背後嘅科學，為咗唔好成日重重複複所以喺度就唔再寫了。 間唔中都有啲身邊朋友話我講嘢重重複複，咁我要學習下精簡啲。 題外話：發現自己自從今年六月開始都冇拍過片， 好似好耐冇同大家傾過計咁，但係其實如果有睇週記嘅你就知道我每個禮拜都有寫周記！從來都唔會走咗去，或者中途放棄。I am persistant, and I show up every week.

最近睇緊一本書叫做「The 10X Rule」，由一位叫 Grant Cardone 嘅作者寫嘅，佢書中其中一個中心思想就係經營一個小嘅公司要 Persistant，每一日都唔好放棄，不斷每日努力，開頭好似好徒勞無功，值如果唔放棄，世界好公平，終有一日會一切變得值得。可能有啲人會覺得好似好廢話，又係呢啲勵志嘢，但我係信的，或者咁講，喺我嘅處境，我知道我需要做嘅就係咁。

扯遠咗，不過都想建議大家如果有買過我哋枕頭都可以睇睇上面link內嘅嗰個小貼士，可能未必你有需要，因為據我哋了解大部份人都冇需要，但係睇睇都無妨。睇完今個星期呢篇週記去望望吧！

第二件事，關於新產品研發同埋實驗。 雖然暫時就真係唔可以講實質嘅嘢，想保持新產品嘅神秘感，但其實呢樣嘢就正正係今個星期想講嘅主題：就係當我哋繼續去深入研究呢個產品嘅時候，其實就真係越嚟越會接觸到更多學術上嘅嘢，會發現自己認識嘅嘢好少，覺得自己有好多可以學習。世界好大，原來學問亦都可以好深。對於我哋個情況來講，所指嘅學問就係一啲科學一啲物料嘅嘅化學同科學。

「求知若飢，虛心若愚」（Stay Hungry. Stay Foolish.） 呢個係當年Steve Jobs講嘅， 其實所指嘅心態我覺得真係好啱。係我哋嘅情況就係可能買一啲物料會發現唔同嘅特性而有發現原來同一種物料，亦都可以用唔同嘅粗幼，唔同嘅形狀，唔同嘅處理等等，做到唔同嘅效果，如果想提升佢哋嘅效能亦都可以做到。 但係凡事都有優缺點， 可能拎到某啲優點嘅同事亦都會產生另一啲缺點，於是要再諗吓點樣去解決返嗰啲缺點又或者有冇方法可以避開唔會產生嗰啲缺點。 雖然現時嘅Re Pillow 2係一個我覺得已經好好嘅產品， 亦都超越咗市面上好多嘅產品， 但係未來呢一個我覺得真係一個最大嘅突破，一個再真係從用家角度出發，一啲細節嘅位，長時間使用先會發現嘅，都有考慮到同埋改善到。因為其實我哋冇乜秘密：只係因為自己都係用自己嘅產品，同埋不斷諗佢點樣改善。專心。唔做第二啲嘢，去做好一樣嘢。我覺得其實就係咁簡單。

如果再講都仲有一樣嘢嘅：我相信創新，同埋我相信要真正有未來，自己一定要專於研發，唔走捷徑。太多公司只係為咗錢，我覺得唔理想。 老老實實，我知道自己嘅壽命有限，我對呢樣嘢係好清楚的，我想希望做到啲嘢真係貢獻到比身邊嘅人。 我係一個好普通嘅人，我只係好幸運有有機會可以試吓做一啲貢獻到其他人嘅嘢， 呢個機會，又唔好講到得自己一個有， 但係唔係每一個人都有機會。我唔想因為我自己懶惰，或者因為我自己想求其生活就算，浪費咗呢個機會。 我平凡普通，一百年之後冇人會再記得自己個名，所以更加想趁住有時間留低啲嘢俾今世嘅人，冇人記得我唔緊要， 但我發明嘅嘢，可以幫到人就夠。

所以間唔中有人問我， 工作嘅動力係咩，大概就係呢個吧。

真係好老土喇，知喇我唔講喇。下星期再見！