#034 新年進步（22/01/2023）

歡迎大家閱讀免年第一篇週記，呢篇週記刊出之時，就係恰好年初一。我個人由星期三開始喉嚨痛，個人「占寒占凍」，夜晚瞓覺忽冷忽熱，一時出汗一時又好凍，直至寫本篇週記一刻仍未好。雖則並非COVID，不過我亦已去睇西醫，開咗啲藥，食咗有藥力發揮時感覺可以，無藥力時就辛苦啲咁。

唔知是否因為上星期經常整呢個新 repillow.co 網站整得太夜，缺乏休息而唔小心捱病咗，但本來我以為應該無咩嘢，可以照樣 Work From Home，照樣做到嘢，但原來卻唔係的，因為當個喉嚨吞口水都痛， 整個人好似冇晒精神冇晒力， 一時發冷一時出汗，坐喺電腦面前做嘢都有啲困難。

有見及此我每次食完藥之後都會即刻做兩個鐘三個鐘嘢， 當藥力開始消散嘅時候我就會轉去睇吓電影，今日週記就係想寫下呢幾日病咗時睇嘅電影。我睇咗：White Hot: The Rise & Fall of Abercrombie & Fitch、Inside Bill's Brain: Decoding Bill Gates、Mars: Inside Space X、同埋今日想講嘅：The Founder。

The Founder

呢一齣係我今個星期病嘅時候睇過最鍾意嘅電影。 故事基於一個真人真事， 講述麥當勞由兩兄弟經營嘅一個小小嘅漢堡店在變為一間國際大企業嘅故事。Mac McDonald 同 Dick McDonald 兩兄弟本來都係打工，後來覺得「工字不出頭」，於是自己創業，經營一間細細哋漢堡店，後來就因為一間餐廳經營成本太多，差啲執笠。喺好辛苦嘅困境下，細佬 Dick McDonald 突然靈機一觸，想試下用一個全新， 非常自動化，有流水式咁嘅系統去做漢堡包。 每一個員工只會負責一 Part ，炸薯條嘅炸薯條，落茄汁嘅落茄汁，去將整個製作漢堡包嘅過程做快啲，仲節省成本。佢哋兩個試咗之後，開頭啲美國人都唔係好接受呢種咁嘅餐廳。後來因為佢真係快啲，而且價錢更加平，所以吸引咗好多人嚟食，餐廳經常排長龍，令到佢哋起死回生。

係呢個時候佢哋遇到一個好失敗嘅推銷員（香港稱為：Sale屎）Ray Kroc， 佢本身嘅工作係周圍上門推銷自動奶昔機， 不過一直都冇乜人同佢買..... 當阿 Ray 想放棄時，當時麥當勞兄弟同阿 Ray 買六部奶昔機， 阿 Ray 就好開心，但當阿 Ray 去到麥當勞餐廳嘅時候，佢覺得麥當勞呢間餐廳唔簡單， 一個全自動嘅廚房，流水線嘅作業，呢個係一個好大嘅商機。 佢個心已經唔再喺賣嗰幾部奶昔機嗰度， 而係不斷游說麥當勞兄弟擴大來做做到全美國都有麥當勞餐廳。 但係麥當勞兄弟就有啲抗拒，因為麥當勞兄弟佢哋覺得自己做一間細細地嘅餐廳，控制到質素就可以，唔需要做到全國都係，做到全國都係的話，好難keep到質素穩定。 佢兩兄弟亦都唔係啲好有大野心嘅人，只係想安安穩穩，有間餐廳仔，夠生活就可以。

阿 Ray 就當然好鄧佢哋唔抵， 佢覺得呢件事可以做到好大，冇理由比呢兩個「無大志」嘅麥當勞兄弟就咁樣抹煞左。於是佢日日喺麥當勞餐廳捕住嗰兩兄弟，死纏爛打， 最後，兩兄弟就頂佢唔順， 俾佢加入麥當勞公司， 負責做 Franchise（加盟）工作，亦都即係開分店。

做做下，麥當勞餐廳開始喺美國各州分都有分店，但當時阿 Ray 面臨一個問題：麥當勞分店係多，但係佢自己同埋各地分店都冇乜盈利。 賣依啲便宜嘅漢堡包，並唔係一個非常有利可圖嘅生意。去到最差嘅情況，阿 Ray 直頭按咗自己間屋，而因為欠債，銀行過嚟要收返阿 Ray 間屋。佢人生陷入谷底。

喺呢個時候，佢遇到一個從事金融嘅人，嗰個金融人教咗佢一招： 每次麥當勞開新舖頭，阿 Ray 會先買咗塊地然之後再租比加盟嘅人，如此每個阿 Ray 就可以收租。麥當勞直程係做緊房地產生意，漢堡包生意就係為咗幫手供嗰塊地嘅錢。再加上土地會升值，日後仲可以將土地賣出去，轉手仍然有利可圖。

呢一招改變左阿 Ray 嘅一生，亦都令麥當勞起死回生。

去到後期，阿 Ray 直頭同麥當勞兩兄弟買起咗成間麥當勞公司，令佢有更多自主權，最後將公司再做得更大，全國開到更多分店。之後嘅事，大家都知道了。相信今時今日都冇乜人唔識麥當勞。

故事就寫到呢度。

其實呢個週記冇乜特別大道理，只係想講 做地產生意真係玩哂 人生真係總會有啲困難嘅時期，尤其去試一門新嘅生意，冇人可以保證成功， 反而失敗嘅人就好多。好似麥當勞故事入邊嘅阿 Ray， 當時銀行要過嚟收返佢間屋，佢老婆都好震驚，點解老公你要連我哋自己屋企都要做埋按揭借錢 support 你嘅生意，令到阿 Ray 好大壓力。 係果一刻，其實冇人知道麥當勞會有今日嘅成功而睇得開，喺果一刻好易覺得絕望。當然一切睇返轉頭都只係一個過程嚟嘅。所以佢嘅堅持係值得，如果嗰下放棄就無今日麥當勞了。

另外一個得著就係有時機會係（1）需要等，會喺你最唔估到時出現（2）有時每個人都有自己知識上、角度上嘅限制，所以會有盲點，有問題未必會睇到，即使睇到問題都未必諗到如何解決，此時就要靠外人。例如麥當勞經營困難時，阿 Ray 根本無諗到（亦都比我都諗唔到）問題出於租金上，以及可以用買賣地皮做漢堡包賺取收入，支撐生意。