#035 為何一直未有一整套嘅床單被袋枕頭袋賣（29/01/2023）

歡迎大家嚟閱讀新一篇週記！今日想講，最近暗中做緊一種全新嘅床上用品，係我哋一直無賣嘅，一整套嘅床單被袋枕頭袋。

先講返啲背景：其實都有唔少客人查詢好想可以買全套的床品套裝，但之所以一直唔做，一直只賣 Re Pillowcase 而沒有全套， 原因係之前覺得未做到一個真係好好，值得令我自己都會覺得係一個突破，一個我滿意嘅一整套嘅床單被袋枕頭袋。雖然係生意上呢個係一個好蠢嘅做法，但至少我係咁諗啦，如果我做唔到一個真係我自己覺得好滿意好自豪嘅產品，咁我都係倒不如唔好做， 因為同出邊都冇大分別，咁其實做出嚟都係浪費，我覺得其實一來辜負其他人對 Re Pillow Co. 的期望，二來其實亦都確實對行業無甚貢獻。

好似講到懶係嘢咁...... 喂！我當日喺「經濟日報」專訪（ http://www.etnet.com.hk/www/tc/health/LA77735）談到，我希望有一日大家望返轉頭，可以為呢件事而自豪，真係唔係吹水係認真嫁！好老土但係真。

你咪笑！可能有日真係成真呢。

所以敬請期待：一整套嘅床單被袋枕頭袋。係做緊的。

另，由於我知道無人睇我啲週記，即時係身邊嘅人都唔會睇，所以或者有啲事我其實唔想同身邊嘅人講，都可以寫喺呢度，請願諒我係有啲自私以下用嚟自己寫比自己睇：

近幾個月覺得創業嘅最難嘅位唔係嚟自於一開頭，因為一開頭你咩都無，同埋你冇咩期望，有一個人買已經好開心。但係去到後少少，當你再投入嘅時候，你冒嘅險更大，有時候你有可能努力咗未必係會有回報，或者回報未到，唔係每日都好天氣。而當身邊嘅人問你做成點，你都好想比到啲嘢佢哋睇，只係嗰個時候你冇嘢可以比到佢睇。嗰一種無力嘅感覺係會有啲啲辛苦。你只係唔想身邊嘅人為你擔心，你知之後一切都會好，但你只係需要啲時間去證明。

我自己係有信心呢一切都會過，事情一定會變好，只係頂唔頂得過而已。

如果有身邊嘅人/擔心我嘅人睇緊，請唔好為我擔心，我可以的。