#037 Re Fresh 登場、土耳其地震和香港製造的思考、雅蘭床褥合作（12/2/2023）

歡迎來到本週週記：今個星期，Re Fresh 正式面世，土耳其發生大地震，我們會雅蘭床褥或會有更多合作的詳情。

各位讀者大家好，又到星期日又到一週週記嘅時間，好快又一星期而依家原來寫寫下已經去到 037，好快到到 052 就一年，突然諗其實週記睇返可能一兩個月之前唔覺啲咩，但若然睇返 4、5 年前嘅就會覺得有價值同有趣。祝願我哋可以見證到嗰一日吧！畢竟，90% of startups fail. That’s just the cold, hard reality.

今個星期，我哋嘅實驗計劃 Re Fresh 正式登場。Re Fresh 係一個完全慈善計劃，扣除成本以後，全部餘下嘅都會捐出比4間機構，係供客人選擇的。呢啲香水都係由我同中學同學 David 一齊調配同整的。話說大概今年9、10月到同佢見面閒談時，佢話佢由年初開始喺度去咗上「調香班」，上咗大半年學整香水，亦考咗唔同證書，跟住佢又比咗佢啲作品我去試，又真係唔錯，個味道較為新同獨特，唔似好商業化嘅大眾味道，我好鍾意（另外，我發現佢啲味噴咗喺衫度真係持香好耐Keep到可以聞）因此由當時起我就有興趣去想一齊整一系列香水比啲客人去試試。後來我就諗，不如用佢嚟實行我一直想藉 Re Pillow Co. 去做嘅事？去做一啲對世界、對香港有意義，有幫助嘅事，香水嘅盈利大家都知道頗高，即使我用返一般市價去售賣，亦可有約一半捐出。所以，就有咗 Re Fresh。

題外話，我哋無資源，件 Product 亦都無收入每讓成本都列出要盡量慳錢去做到，樽身個貼紙同盒嘅貼紙都係自己電腦普通 Printer 印同貼上去的，好難貼，好多都貼咗好多次貼完再貼好想力求完美但都係唔太專業...... 要講聲 Sorry。

土耳其今個星期發生大地震，傷亡慘重。我哋有一個重要嘅供應商，其實就喺土耳其，佢哋係負責供應嚟緊一啲新產品嘅其中一種物料，一直都有聯絡。今次地震雖然唔係落喺佢哋廠嗰邊，但佢哋都有家人住喺災區，幸好人無事，只係就亦失去居所了。因為土耳其天氣好凍，令到佢哋災民更加辛苦，佢話佢哋廠嗰邊亦都即時開機轉在不斷做頸巾、毛氈等，去送去災區幫忙。今次對於佢哋國家嚟講，真係一個大型災難。話說呢個都返返 2020，做初代 Re Pillow 時我都曾經諗過如果香港有天災人禍發生點算，所以點解要香港製造，點解要保留自家生產線，其實有一啲諗法喺入面。假若有日有咩事發生，我哋可以將廠房轉為生產某啲短缺物資，派出去比人。當然呢啲嘢寫出嚟大概會比人覺得又點拎光環懶偉大，你咁偉大唔好收錢吖嗰啲，但呢度人少，又收得夠埋，可以寫！

題外話，上星期亦去咗雅蘭床褥總部到談論一啲大家有可能嘅合作計劃，由於如果最後未能合作會好「魚」，所以詳情我都係唔好寫了，不過喺大家傾談之間，我覺得佢哋係同我哋大家理念接近，即使最後我哋未可合作，都好慶幸認識到佢哋。