#039 員工 Hoodie Zip Up Jacket（26/02/2023）

歡迎大家來到本週週記！又繼續由我同大家講下今個星期嘅最新發展。講圖中件 Hoodie 之前，講啲Update先

最近有唔同嘅脊醫診所、物理治療同埋中醫診所都聯絡尋求合作，亦有物理治療中心同中醫診所已經開始喺中心使用同售賣我哋嘅 Re Pillow 2 枕頭，能夠得到呢啲嘅機構/診所去認可我嘅工作確實係開心，但我哋必須繼續努力不負所望。

如早幾星期開始提及，最近喺度做緊其他床上用品Prototyping嘅事，未來 Re Pillow Co. 會擴展做哂整個床上嘅產品。但緊要嘅係做還做，勿忘初心，亦即唔好為做而做。我明白實在所謂營商好多時好多公司會為營業額為盈利去擴展產品，維持公司營運。Re Pillow Co. 係，係無錢，但我哋嘅產品一定要係做得好。我信長遠嚟講，重視產品真係要做得好，一定會 Pay Off（當然，問題係要捱到去見到嗰一日，最近多咗留意唔同嘅公司嚟又去，好多喺差唔多時候出現嘅公司都消失了......）

關於做咩產品，新產品 detail 嗰啲，唔可以講住......

另外，今個星期我都設計咗件員工外套，比門市同事可以著（因為呢家係無公司衫的，有時可能比人形象唔夠統一整齊，所以花咗啲時間整一件）。設計係我自己諗同畫的！我已經自己印咗件著緊。

上面寫住：Trust the Process. Believe in Yourself. 包住個「Re」Logo

係我呢三四年來做 Re Pillow Co. 嘅心聲。人人都可以做到自己想做嘅事的，但你要信會一定只要睇唔睇到希望都繼續做（Trust the Process），同埋有時唔好比其他人/出面嘅事打沉，要信自己（Believe in Yourself）就會得了。

今個星期其實實在太多突如其來，但無法喺度寫嘅事發生咗。係關於自己太天真易信任他人嘅事。有時本住最單純善良嘅心，反而卻會令自己被人利用。有啲攰。願諒寫得有啲短，但我都一定會繼續寫。下星期見！