#044 太古的最後一夜（02/04/2023）

2023年3月30日是圖中我們第一間門市太古城店嘅最後一日。太古城店，前稱「太古城體驗館」，因為開咗尖沙咀 iSQUARE 店而易名，但本質都係一樣，一間 180 尺嘅小型 Pop Up Store。喺 2022 年 3 月 10 日正式開張，除咗新年休息咗 4 日從來都未休息過，咁就開咗一年了。今個星期週記就寫寫佢吧。

記得當時係 22 年一月，太古地產租務部 email 邀請，問 Re Pillow Co. 有冇興趣於太古城開一間 Pop Up 門市，太古城離我平日生活地點活動範圍好遠，雖然有聽聞但其實從未真係行過，但因為試吓喺商場開 Pop Up Store 呢件事情好令我當堂興奮，所以當時我喺屋企本身溫緊書，收到 email 嘅一個鐘之後，我就自己一個衝咗去太古城睇吓嗰個位。我仲好記得我去咗行咗一陣，周圍兜下行下，返屋企搭車時仲諗緊應唔應該去做。因為我好驚。

驚到返到屋企明明食飯時間，我就唔食，喺度諗。

去唔去開舖好？

呀，唔記得要比返啲背景，當時嘅 Re Pillow 係無現時咁知名（雖然現時都唔知名），我只係做網上單同埋喺沙田一田有上貨架比佢哋賣我嘅枕頭。我擔心一切都係「虛火」。網上單，無單嘅時候就唔記，尚且個 running cost 都還好一啲，進可攻退可守。但開咗門市唔同，門市要請人要出人工，亦要交租。唔可以話：今個月無生意，所以唔出糧唔交租了。如果開門市，會唔會好大風險？會唔會收入 support 唔到？我擔心呢一切嘅問題，我心大心細，但我知自己，好想一試。

後來，我得知租約係 3 個月，成本上，都好似有一個 upper limit 令自己心中有數放心啲，因此，最後當然 take up 咗個 offer 並且開咗呢間舖。商場方面亦好好，邀請同讓我哋續租到一年，所以到到今年 3 月先完。呢個就係 Re Pillow 開門市嘅事。

未來我都會繼續努力，戰勝自己嘅恐懼，唔好限制咗自己，希望可以真正將這件事做好。希望有一日大家睇返轉頭都會覺得，呢一切都值得。