#045 產品推出速度、一件小事、Balancing everything（09/04/2023）

（圖：幫緊 Re Pillowcase 2 影相）

今個星期繼續都係做緊早前幾件新產品。上個星期出咗個Facebook / IG post，預計 Re Quilt 2 四月底至五月中出。後來我就發現有一個問題：原來有啲拉鍊應該趕唔切，變咗又可能又要推遲...... 令我諗起今個星期發生另一件事，下文詳述。

為免成件成太慢，我可能會先介紹咗件產品，跟住之後可以接受預訂，之後當拉鍊到之後，加一星期做好，就出大貨寄出，咁樣做法，等大家唔好等得咁耐。我做咗好耐好耐，耐到亦有收到有人善意提醒話我哋推出產品速度好慢，甚至懷疑 Re Pillow Co. 會唔會「食老本」，唔再出新...... 聽到開頭覺得好委屈，但諗多陣其實佢無講錯到，確實可能佢有咁嘅感覺。我責無旁貸。

今個星期，都想講下一件小事。有一個客人早幾日聯絡我哋，發現網站落單嘅系統上面有一啲 Bug，令到成個落單過程好唔順暢。咁就當然我哋好快都發現咗個問題，都好快去解決咁嗰位客人，佢亦都好好好客氣，佢話其實我哋嘅枕頭好好，但係網站嘅落單過程嗰度真係要改善一下。故事就講到呢度。

以上呢個網站有 Bug 嘅故事，以及開頭提到產品推出速度問題，係今個星期主要嘅 thoughts。客人有期望係一件好事，我嘅任務係要分配時間，並且要 check 住各樣事情，keep 住要每樣事情 on track，有啲位要多啲推吓其他 partners 去做快啲，尤其近嚟多咗好多外部合作事宜。而因為我哋都係細無咩 bargaining power，只可以好快 revert 比佢哋，但佢慢我都迫唔到佢。

如果有日有一個想創業嘅年輕人睇到呢啲 Re Pillow Co. 週記，以下係我少少淺見：你會好多嘢做好多 part 嘢都要跟，例如可能有啲裝修會錯，可能有啲人好多嘢做，有啲人好得閒，要諗辦法唔令人反感下解決。以下係重點：一切都係講點樣 balance，balance 嘅意思係，你要花時間做你嘅主業（提供產品、服務），但同時你亦都要花時間去做其他周邊工作（請人、門市、網站設計、改善整體購物體驗、分配工作給他人、商業合作、專利、保護自己法律權益、宣傳方法、了解市場需要、會計、報稅、強積金...... ），每一樣嘢都不可或缺。

之所以我提出以上呢樣嘢，係因為我希望 Re Pillow Co. 可以真係繼續到落去，所以我會留意唔同公司嘅做法同下場。有啲公司一直都只係側重宣傳或Gimmick，產品其實只係一般甚至差，當一個浪湧埋嚟，或者突然公司某一宣傳技倆唔可以再用，成間公司就支持唔到落去。亦有啲公司做一啲產品出來，自己覺得好好，但其實市場上無需要，好似「太陽能電筒」情況，其實亦會好吃力。再一個例子，可能公司正正經經做生意，價錢OK，品質OK，無咩花巧，但老闆唔識如何計算成本，分配資源，用錯了喺某啲地方（冗員、投資並非關鍵地方），當有其他人計算叻過佢，呢間公司都會好吃力。所以所有周邊工作都要理，唔可以只係做主業的......

呢個亦係其中一個我開初嘅錯誤，現在正喺度努力補救中。希望你唔好同，我一樣，行少啲冤枉路，可以推到產品快就盡量快，但背後嘅周邊工作同樣重要，第一個任務係要生存，唔好死。

寫寫下唔知寫咗去邊，今個星期就此擱筆。