#048 Re Pillow Co. 做過最錯的 2 個決定（30/04/2023）

Hello 大家好，歡迎嚟到今個星期嘅週記！一如喺標題提到，今個星期我想寫寫關於喺呢幾年嚟，做 Re Pillow Co. 過程之中，我做過 2 個最錯嘅決定。

先比少少 back story：我由 2020 年開始研究枕頭，年底做出咗一個成品比自己用（後來亦做多幾個比想要嘅朋友用），喺朋友鼓勵下，我整咗個網站 repillow.co（當時無呢個咁靚，係非常簡單，有介紹、有得落單咁），將枕頭推出，可供出面嘅人買，開頭大半年都係無咩人理會，直到 2021 年 8 月，我設計同生產咗 Re Pillow 2，Re Pillow 2 開始有啲人理，去到 2021 年底，Re Pillow 2 開始受歡迎，亦有傳媒來採訪，想了解「學生造枕頭」嘅故事。喺 2022 年中，我畢業，全職投入 Re Pillow Co. 工作，到到依家。

呢個過程之中，有 2 個決定，我覺得係做錯嘅：

#1 花咗太多時間營運每日工作，不斷忙忙忙，但新產品推出卻太慢

其實一直以來，我都要包辦整個 Re Pillow Co. 所有上上下下嘅工作，包括寫文章、落廣告、計數、包貨、回覆客人查詢、安掛送貨、售後服務、跟進產品製作進度、跟新生產商合作...... 種種種種，變咗每日就只係忙忙忙，甚少時間可以坐低，做到一啲如設計新產品嘅工作，當然亦有做，但係因為其他工作實在花費我每日絕大部份嘅時間，花嘅時間實在唔夠。

約上年年底， Ben（同事/前同學）亦漸漸幫忙 take up 咗更多工作，我亦都花咗更多時間去放低本身日常忙忙忙嘅工作，轉而可以多啲間間處理新產品。雖然由年底到今日，當中亦經歷咗尖沙咀 iSQUARE 店開幕，以及港島太古店搬到北角港運城店再開嘅事，但整體上係花多返好多時間喺產品度，可以準備新產品。因為長遠而言，產品可以進步，而且亦可以有多啲唔同種類比客人選購，令到客人有多啲選擇之餘，亦係可以幫助公司穩定收入。但要買啲產品返嚟轉手易，要研究產品自己設計生產難，花嘅時間亦都會多，既然揀咗呢條路，就要好好行落去。

#2 在資金和時間未可支撐情況下，簽約開了兩間門市

喺執筆呢一刻（2023 年 4 月），我哋同時營運緊一間尖沙咀 iSQUARE 店，以及一間北角港運城店。呢一刻我認為要同時營運兩間舖係一個錯誤。開一間舖首先要裝修，然後再請人，其實個每月 running cost 都頗高。加上本身第一點提到嘅問題，即使有人想喺我哋到買啲嘢，都無嘢買到。加上床上用品本身係都壽命長，會令經營更難。

簽約當時因為當刻覺得似乎生意可以支持到，所以先做咗咁嘅決定。但當淡季來臨，就覺得呢個未必係最好嘅決定。而且加上近一兩年零售業非常缺人，人工有上升之勢，對我哋蚊型公司影響最大。

因為 Re Pillow Co. 並無 external funding，擴展速度唔可能太快，一定要小心用啲資金，避免為自己整咗太多未來嘅開支。如果比我再做一次個決定，我會小心啲，唔會開兩間舖，當然係會行得慢咗，但既然 product 推出速度係慢，咁就「無咁大個頭唔好戴咁大頂帽」，開一間先。花無百日紅。

兩間舖，人工兩份，租金兩份，裝修兩份，夾夾埋埋，數其實唔細。如果再做一次決定，我可能會開一間，個租金貴少少，人流多啲嘅商場，一間過，租金會貴啲，但人工出一份，裝修亦出一份，總數希望少過現時。一間舖過亦有另一好處係管理安排上會易啲，因為其實我哋所謂「Re Pillow 團隊」，除門市同事外，就係我同 Ben 兩個，即所有產品研究、搬貨、出貨、寄順豐、覆顧客查詢、聯絡供應商、訂購物料、設計門市裝修、與不同合作夥伴接洽、測試產品、宣傳、會計，基本上全部都係我同 Ben 了，所以如果再揀多次，一間算啦，根本唔夠實力，亦做唔到咁多工作。

結語

人總唔可以不斷往後望嫁啦，繼續努力吧。係成定敗，無嘢係整定嘅，最緊要係錯咗，快快學返，learn the lesson，然後改正，繼續行落去。