#130 今日與 2022 年產品規劃（24/11/2024）

今個星期講吓一啲產品規劃嘅事情，講吓之前嘅做法，講吓依家嘅做法，講吓成長。

先講之前嘅做法，或者唔好講 2022 年之前，因為當時基本上係冇產品規劃的，當時只係我讀緊書嘅時候自己去試吓做一啲自己想用嘅產品，因此冇任何計劃，想就去做，而當時如果冇記錯應該都係只係得一個枕頭同埋兩個枕頭袋，再加兩張被，一張冬天一張夏天，僅此而已。非常非常基本嘅產品線，亦都坦白講，因為銷量唔多，而且主力其實只係枕頭，其他都不是主力，因此比較起上嚟，當時真係沒有特別花時間去鑽研產品，現在真係認真得多。去到 2022 年，當時年初得到一啲傳媒嘅訪問，令到開始成長，好似需要有啲計劃。

2022-2023 初依段時期推出嘅產品都並不是好有規劃的，如果有人有印象，2023 年初我哋推出過一個香水產品，依家睇返轉頭，真係同自己本業完全冇關係，當然當時亦沒有諗咁多，只係一個好朋友在玩此事，覺得有趣就一齊去玩，也從中做啲善事。不過亦都可以睇到當時嘅我是沒有計劃的，產品話出就出，冇一個未來一年或者點樣嘅計劃，亦都背後冇一套邏輯去諗邊啲嘢我哋做邊啲嘢唔做。去到 2023 年中，當時生意有頗大困難，因此更加立定決心要需要更認真去做。大約由嗰時開始我就好忙，開始每一日都充實忙碌嘅生活。去到 2024 年初，因為一位同事離開而更為忙碌。但亦都係呢段忙碌嘅時期，開始更了解自己嘅生意上下，並且開始有啲計劃如何去做，產品開始有鋪排，依件事情由年中到年底開始更明顯，我相信去到下年 2025 會更明顯，產品開始有時間表同有鋪排，而且鋪排是有原因，係逐步逐步希望更加越做越好。

月底仲有一個被袋要出，敬請期待。

而出埋被袋之後，我們就終於經歷四年之後，終於將整個床上用品嘅界別嘅嘢都做齊，枕頭、被、床單、枕頭袋、被袋。完全齊晒。有啲公司佢會好快就已經做晒，不過佢哋係都係用返啲正路嘅設計，唔係有太多諗法佢點樣改。但係我哋根據返自己嘅節奏，做好先出，做好先出，用咗四年時間，終於所有出晒。

先講一講：可能有啲人會諗，好似仲爭床褥，但床褥是不計的。傳統上，雖然依家好多公司都做床上用品時候做埋床褥，但傳統上床褥係另一啲公司去做，我哋做床上用品係講緊嗰啲紡織品，枕頭被嗰啲，床褥做不包含在內。希望大家可以沿途一齊參加依段旅程，同我一齊行，睇吓行到幾遠。（即係叫你買吓嘢…… 哈哈，不過你可以到時都好威咁同啲朋友講自己係好開頭， Re Pillow 開頭得幾間做嘅時候，就已經有成為最初嘅支持者）

好多人第一二次創業都總會未必成功，多數去到第四五次嘅 Project 先會成功。依個並不是想打沉希望創業的人嘅意志，而係確實數據上真係咁樣，要有合適嘅心理準備，如果唔係到時一遇到困難，第一次失敗的時候會好容易放棄。當然我都不例外，我都係第四五次做自己的 Passion Project 先有現在的 Re Pillow。

喺一開初嘅時候，唔好怕失敗！有諗法就試吓去做。放心絕大機會是會失敗的，但我嘅建議係你亦都需要最好在短時間之內做多啲失敗多啲，之後條路會相對行得順利啲。