#049 做產品的思考（07/05/2023）

Hello 歡迎閱讀我哋新一週嘅週記。今個星期主要都係喺度改善緊唔同未推出嘅產品、搵嘅材料、訂造配件等等。其實跟半年來好似可能俾人感覺冇咩發展，但係背後做緊嘅產品都花咗好多時間，其實做嘅嘢係比起之前更加多。亦都要感謝我嘅舊同學/同事阿Ben，分擔咗好多日常嘅工作，使到新產品可以發展。關於過去一年嘅工作，同埋可能當中做錯嘅事，可以睇返上個星期嘅週記，今個星期想講啲呢排設計時思考嘅嘢。

Re Pillow Co. 代表啲咩？

以往我其實唔係好答到呢條問題。我知道重視品質，我知道我想件事係貼合年輕，我知道佢係創新，但確實點做，有冇咩 guiding principles。可能以往我冇一個好確定嘅答案。呢排準備緊新產品嘅時候，我覺得我有咗更加清晰嘅諗法，以下分段列點寫下：

我想我嘅產品係方便使用：

使用係輕鬆嘅，可以好易咁樣去處理，it just works. 而且產品亦要好容易清潔， 好容易打理。係可能嘅情況底下，盡量唔好要強迫用家改變佢本身嘅使用習慣，例如用家可能3星期先會將床單放入洗衣機洗一次，產品設計唔應該係做到個用家要可能每星期就要放入洗衣機一次，又或者迫佢要手洗。

我想產品 Catalog 係簡單得來，但係唔同嘅人亦都可以搵到佢哋所需嘅嘢：

市面上床上用品公司嘅產品選擇實在太多，而且每一個產品當中嘅差別，可能係微乎其微，根本唔影響使用者使用，甚至冇人會發現兩件之間嘅分別。日後，雖然我哋嘅產品會越來越多但係我希望可以保持到，令到消費者可以好容易咁樣選擇到合適自己嘅產品。成個產品線要好簡單易明，而且我哋唔可以將某一啲功能就留喺某一個高級產品，特登將平啲產品做個缺陷比佢。唔同產品嘅價錢、功能可能會唔同，但係佢哋應該都係喺果一個價位，做到該名用家期望有嘅功效，因為誠實嘅營商模式，先可以令該名用家再返嚟之後再試其他嘅產品。

如果可以的話，產品應該有多個一個功能：

盡量唔好做嗰啲只有一個功能嘅產品。當然產品應該有佢嘅主要功能，而且係佢嘅做依個主要嘅功能嘅時候係非常好，但盡可能可能令到依件產品可以活用到喺唔同地方，令到產品可以好好咁使用。地球嘅資源有限，如果每一個產品都只能夠做一件事，變相就會令每一個人都需要擁有更多嘅產品先可以生活。 因此如果我哋可以做到個產品，可以喺佢本身主要嘅功能以上，同時兼顧一啲其他功能，咁係會更加好。例如如果我哋做一件運動風褸，佢唔單止可以喺星期六日行山嘅時候用，而且佢嘅設計、配色等都可以喺可能週末出街、行商場都可以用到嘅話，咁就係更加好嘅設計。

產品盡量係可以讓用家自己輕鬆維修、又或者可以透過一啲方式去令佢折舊之後，可以重新翻新再用過：

承接上面講嘅嘢，地球嘅資源實在需要用得其所， 播希望每件產品嘅壽命都可以更加長，同埋喺佢壽命以內嘅日子可以物盡其用。 因此每件產品盡量可以做到輕鬆維修， 而且即使可能係一啲消耗性嘅產品，都可以透過一啲方式令到消耗嘅位置可以換走，而其他可以繼續用嘅配件可以繼續使用，令一件產品可以用得更加耐。

改善產品的方法：

喺改善產品嘅時候，我哋要基於我哋所知道嘅，去搵一件產品最磨蝕得最快、最容易壞、最弱嘅位置然後加固佢，令到個原本係產品入邊最弱嘅位置得以強化。 再下一次嘅時候，我哋就再搵呢件改良版嘅產品，下一個最弱嘅位置喺邊度，然後又諗辦法強化佢， 我哋不斷重複呢件事，久而久之，產品就會越做越好。

結語：

我靜靜咁喺背後努力，唔好鬆懈，我知道只要唔停，一切都會變好。

多謝你睇到嚟呢度，大家都要喺生活度加油。