又到到年底可以回顧一年，今日我睇返 #073 的週記，嗰篇係 2023 年 10 月寫下，曾經回顧自己 2022 年好似忙忙忙每日其實都係處理緊「手頭上嘅事」，而並沒有真係好夠努力。而現在回顧返，2022 年嘅自己真係唔夠努力，有時我都係喺度諗返轉頭點解當時好似冇乜做過任何嘢，嗰種冇乜做過任何嘢，係當你睇返轉頭，你唔記得當年自己做過啲咩。每日嘅營營役役，似乎最後冇得到啲咩。工作上並冇乜嘢大嘅突破，並沒有喺產品上面落咗更多嘅功夫為未來準備。而 2023 年確實尤其由年中打後，真係明顯努力咗好多，亦都做咗幾張好用嘅被、做咗 Pro Add-On 呢一個非常受歡迎嘅 addition、同埋最重要嘅係，2023 年底開始咗一個全新系列 —— 新床單。
2023 年底推出新床單，亦都係開始咗今年 2024 全年嘅工作方向。
做新床單係一個痛苦嘅歷程，唔講產品本身，佢產品以外當中牽涉太多範疇我係唔認識亦係需要獨自去面對，包括喺款式上如何滿足消費者品味、如何估算銷量和管理不同尺碼不同顏色的庫存，盡量唔好有尺寸做得太多，另一啲尺寸就做得不夠，同樣如何分配唔同尺碼顏色到不同分店，盡量令到客人隨時現貨可以買走多啲嘢，開開心心，今晚就開始用，又係一個困難嘅事情。比起開頭只係有幾款枕頭，又困難一大截。我相信痛苦嘅過程係令人成長，我相信只要經過咗中間呢個過程之後自己會走得更堅壯。如果回顧返 2024 全年，其實8月之前，真係亦都有一種不斷每日營營役役嘅感覺，就係處理以上嘅事情。直到近幾個月開始慢慢做咗一個比較好嘅系統去處理呢啲事情，慢慢先叫做行得好啲。
今年亦經歷將上年新床單的「四款尺碼六種顏色」，變成了「13種尺碼17種款式」，當中包含不同質地、開始有花款，也有當中好有特色、特別版的地圖床單。我目標希望可以將新床單普及化，因此為此仍然在努力。如果要概括，2023 年係開咗個頭，2024 年今年係真係將細節同埋各樣執行上嘅事情做好，同樣喺款式相同尺碼上開始增加，令到多啲人可以用到同埋開始會考慮選擇新床單。當然這樣係不夠的，下年仍需繼續努力將佢推廣出去同埋繼續不論係前面（產品、銷售）或者背後（管理、生產、物流運輸）都更加做得更好，希望成為更多人嘅選擇。但當然，謀事在人，成事在天。
今年亦都嘗試做更多不同的事情，包括第一次參加會展家居博覽、第一次贊助一些公眾活動（環島徑挑戰 Coastal Trail Challenge 慈善活動）、也第一次開始商談一些卡通合作。我在努力。慢慢開始工作耐咗，發現有太多嘅事情係無法控制，原來做人只能夠最好專心喺自己五呎範圍之內嘅事，因為如果將呢啲事情做好，其實已經可以忙得不可開交，唔需要諗啲太長遠嘅事情上面嘅細節，以往我曾經都會諗依啲事，但原來係冇辦法諗，因為事情好多時候都唔係好似我哋想像中咁樣發生，因此討論得太遠嘅事當中的執行細節同埋擔憂，有時候係浪費時間。留意咁樣唔係代表要沒有大嘅目標同埋工作方向，目標同埋大約嘅長遠策劃係重要的，只係唔需要諗到究竟五年之後嘅一啲細節執行上嘅事情，因為你係冇得諗。慢慢開始，有啲工作心得。
#128 地圖床單終於出（10/11/2024）
#130 今日與 2022 年產品規劃（24/11/2024）