#052 不斷 send email 的一週（28/05/2023）

歡迎來到本週週記，又係我同大家簡單咁講一講今個星期做咗啲乜嘢嘢。

RQ2 接近完成

Re Quilt 2 已接近完成，但係現在已經係五月底，其實某程度上都輕輕錯過咗夏天一轉季啲人想買被嘅日子（最理想 3 月推出），可以話係揼心口，我知道門市嘅同事都好心急我都非常心急，但係我真係好想將每一樣嘢都做好先出， 唔想做一件自己知道可以再做好啲嘅產品。不過呢個就當買個教訓，因為之後嘅產品我會再早啲開始準備， 畢竟其實呢一個 Re Quilt 2 係咁耐以來，第一個真係話真係好 from the ground up 同行內做嘅嘢非常唔同嘅產品， 我覺得係好勁（至少我認為）。

與年輕運輸公司團隊晚飯

今個星期我同阿Ben約咗一個運輸公司團隊食飯，大家傾吓合作嘅空間同埋互相認識下，畢竟大家都算係年輕嘅公司，都好想大家認識下。佢哋係一個年輕嘅運輸團隊，比較出名係幫人搬屋，亦都曾經利用佢哋自己嘅貨車同埋搬運人手，去幫啲公公婆婆同草根階層，可能有啲人都估到會係邊一間公司。 佢哋係我好早好早期嘅時候，已經有搵過我講話加油等等，印象深刻， 大家間中都有短訊幾句，今個星期就約咗出嚟一齊食餐飯。聽完佢哋講之後，覺得佢哋好有理念，應該只要唔好放棄，一定會好成功。我哋日後亦都有機會會合作。

新類別產品Prototyping

汲取 RQ2（Re Quilt 2）教訓，今年年底推出嘅產品現在就要處理，除咗上兩個星期講嘅入紙申請專利， 今個星期再做多咗啲測試品， 將啲 detail 位都要做好埋，早啲解決各樣嘅問題！ 咁樣就唔會話一件產品同第二件產品好大個 time gap。 其實我都唔明，我明明好似一直喺度忙緊，但係可能外人睇起上嚟就會覺得好似好耐都冇新嘢。 我有時好憎自己。好似一直都仲未夠，好似仲未做得夠努力，好似仲未夠快，做嘢未夠多， 但明明每日都喺度忙緊。呢樣嘢我會自己留意。

不斷 send email 

因應新產品需求、國際局勢嘅變化、 以及香港製造越來越難請人（要懂得車縫嘅人唔多了）， 要部署一下未來，以及五年之後嘅生產線會點樣處理。最穩陣方法係 Diversify 產地同原材料供應，減低風險。 呢個需要係源於世界有好多不穩定因素，以致令到唔可以單單靠一個地方生產：例如俄烏打仗令到歐洲電費增加，歐洲廠商製佢成本非常高，而最近中美交惡，以致西方品牌脫鈎中國（Decoupling China），將本身中國的生產搬到其他亞洲國家製造，亦令到東南亞嘅廠商生意好到不知得了，非常之忙，以致唔得閒理我依啲細公司嘅生產。我實在真係摸着石頭過河從來冇面對過依啲事情，於是我睇咗唔同書同埋成功公司供應鏈主管嘅訪問，暫時嘅睇法係搵幾個主要地區嘅國家設有合作生產線：例如歐洲一個，中國一到兩個，香港睇吓自己維唔維持到一個，再或許東南亞試吓傾一個，各自負責唔同嘅產品。我嘅任務就係要搵到底呢啲國家佢哋做得比較好係乜嘢類型嘅工序， 有啲乜嘢嘅天然資源同優勢，再呢間廠出嚟，建立長期合作關係。現有我們都有啲合作夥伴但係未必足夠，所以我最近都喺度不斷send email或者message，搵緊廠商可以合作一齊做嚟緊嘅新產品。有啲似幾年之前搵工嘅時候不斷寫 cover letter 同 send email，其實只要唔放棄就一定會搵到。

今個星期講到呢度下星期再見！

PS. 附影片一條，屋企隻貓喺度玩一個失敗嘅 RQ2 盒 sample