#054 做產品的心得（11/06/2023）

歡迎大家嚟到閱讀本週週記！又來到一星期嘅最後，一齊來輕輕鬆鬆傾下計。

同上星期一樣，今星期繼續喺度做緊一個今年年底推出嘅產品 sampling，亦已正式委托了公司去稿寫專案書，申請專利，相信一個月後當專利已入紙，就可以放任講。喺製作 sampling 嘅時候，有一個位我覺得係想喺度寫一寫，希望可以幫到一啲睇緊週記嘅人，當佢哋有一日去「發明產品」、或者想嘗試做一啲新嘢嘅時候都可以參考：

預留九個月至一年時間，不論成功率有幾低都去試

呢個概念係咁嘅：要將你腦入面嘅主意變成現實，留多啲時間比自己去試！九個月、一年，似乎係一個幾好嘅期限。喺呢個期限入邊，你需要將你嘅諗法化為現實，不論你係做產品、想創業、抑或想做一個創新嘅服務，你應該可以比自己一個期限，我自己經驗就係九個月到一年時間，佢比到足夠嘅壓力你，唔俾你去放鬆，同時間佢亦都唔會太短，令到你冇辦法真係將件事化成現實。我相信做唔同嘅事情需要嘅時間唔同，呢個只係參考。

喺未做 Re Pillow 之前，我試過整網站或搞啲 project 自己玩等，為興趣，每個 project 我諗大概都真係搞 6-9個月左右，當然佢哋都失敗，但係喺呢段時間入邊我有足夠嘅壓力去嘗試將佢成事，亦都可以比我有足夠時間去不斷嘗試不斷跌低同企返起身。

喺嘗試嘅過程之中，你可能會有唔同嘅諗法，有唔同嘅方法去做一件事，我建議你不論每個方法嘅成功率有幾低都去試一次，實實在在咁樣去試咗佢，唔好有偏見或者成見，唔好未真真正正試之前已經諗定咗係要用某一個方法去做。你要完全中立，幻想自己係一個天平，將每一個方法都試一次，然後先至決定究竟最後用咩方法。

呢個亦都係我自己去研究啲product嘅時候用嘅方法，有啲即使好蠢好蠢，睇落應該唔會做到（事實最後都係無做得到）嘅方法，我都會認認真真去試一次，測試完先至落定論。所以要預留多啲時間比自己，其實其中一個原因就係咁樣。

Re Quilt 2 其實就係經過不斷不斷呢啲過程先會出現到，今個月之內會推出，其實我好興奮！我覺得佢真係一個全新破格嘅產品。好快大家就會見到。