歡迎來到新一週週記！又到咗我同大家傾偈嘅時候！講講今個星期嘅一啲事：
看舖
今個星期其中兩日因為同事臨時有事未能返工，去咗看舖，當中一日去咗北角港運城，一日去咗尖沙咀iSQUARE。當中發現咗幾件事：第一就係喺平日嘅17:00之前基本上都唔係太多人喺呢兩個商場，畢竟可能大家都需要放工五六點時間之後才得閒，舖頭才開始比較有人。另一樣嘢就係師傅客人都幾鍾意新嘅 Pro Add-On，都有不同嘅客人都可能對我哋本身唔認識，第一次見到呢條柱都覺得個可以用拉拉鍊，拆除外套調節粗幼設計好聰明，而且因為質感做到和枕頭其他部份非常融合，唔會感覺到某一部份硬咗出嚟咁樣，感覺非常好，新客人都同我講覺得我們落足心機去做，令我感覺好欣慰。
另外，同客人閒談其實真係一個好輕鬆愉快嘅經歷，呢兩日嘅經驗都令我有時候不如花啲時間可以去舖頭同客人傾吓偈。我確實必須承認我花喺兩間舖嘅時間唔足夠，門市有大量可以改善嘅空間。但係我始終深信現時最急切係我哋要需要有更豐富、優質嘅產品，比到更多人可以嚟到睇，亦都建立起我哋嘅品牌，盡可能在困難的空間内盡量發揮，生存。
Pro Add-On 的製作困難
講開嗰條 Re Pillow 3 嘅 Pro Add-On，不得不提佢嘅車工同埋製作真係好複雜，非常考驗車衣姐姐嘅手工。話說有同事曾經問過我係唔係我去親自車，我可以好老實咁答，我絕對唔能夠勝任呢個工作，佢嘅尺寸要求精準，而且因為我哋 Pro Add-On 使用嘅呢款布料係有彈性，加上內裏嘅乳膠都有自己嘅彈性，會令到控制上更加困難，要非常高車縫技巧先可以做得整個產品表面平整，靚靚仔仔，真係實在好不容易。所以如果買到嘅用家，真係需要好好珍惜。今個星期我哋曾經試過一個下晝先做到兩條，可見所花費嘅時間同埋心力有幾多。
諗起細個讀書，有一句說話「誰知盤中飱，粒粒皆辛苦」，或許形容喺度確實都好貼切。
冬天快到了
話咁快就快八月底，好快又到冬天。今個冬天嘅產品其中一樣，今個星期已經準備得七七八八，我緊記今年四、五月 Re Quilt 2嘅教訓，因為產品太遲研發，初期做嘅時候亦都缺乏迫切感，令到佢無法喺天氣轉熱嘅時候登場。今年冬天，唔會再係咁。現時其中一件冬天產品相信應該九月中準備好，絕對趕得及冬天轉冷之前有貨，真係有經一事長一智。
另外突然醒起上年冬季都講過一啲說話，關於「一齊渡過經濟寒冬」，好似一年過去，冬天又將之，經濟都係麻麻地，睇嚟今年都要再經過經濟寒冬，大家都加油。
#063 影片式週記（13/08/2023）
#065 關於創業（2）（27/08/2023）