#091 門市的一件小事（25/02/2024）

圖：有日夜晚 （其實都唔係好夜），全公司人走哂，我自己一個唔記得開燈，但燈掣又好遠，太黑打唔到字，於是上網睇吓點樣開個 keyboard backlight，是可以彩色的，買返嚟用咗咁耐都無用過呢個「著燈功能」……

歡迎大家嚟到今個星期嘅週記！今個星期我都有去到舖頭度，當中遇到一個比較特別嘅客人情況，想喺度分享一下 。其實依位客人（姨姨）佢本身係朋友推薦，亦已經有留意咗 Re Pillow 3 一段時間，明白嗰個枕頭嘅功能特色，而且佢都知道自己係需要一個枕頭，但係佢同你傾偈嘅過程中，你會感覺到佢係不斷嘗試提出質疑，你感覺到佢內心其實不斷諗緊呢一樣嘢：「無可能會咁好的，一定有啲問題，等我再睇下點樣問，一定問到你口啞啞」但對於我嚟講，我覺得佢係無惡意的 。我感受到有佢心入面係有一種痛苦，喺質問、懷疑同擔心嘅背後，其實源於一種保護自己嘅心態 。佢看似對於個產品有唔同嘅質疑，係其實我覺得佢唔係真係想挑戰你，因為如果佢對於產品完全冇興趣，佢就根本唔會花時間特登過來尖沙咀舖頭 。佢純粹係有一種痛楚喺心。言辭上佢好似針鋒相對，其實呢啲人係最需要幫助的 。可能佢曾經都買過太多太多嘅枕頭，因此佢對於整個枕頭唔同嘅大品牌同公司失去信心，因此為咗保護自己，佢要問得仔細啲 。所以其實同呢位姨姨傾談過程中，雖然佢語氣比較不太禮貌，但我亦都好坦誠相對 ，盡量了解到底佢嘅擔心喺邊度，然後一一解答佢嘅疑問 。雖然最後佢只係掉下一句：「諗吓先」就轉身離開 ，我感覺到佢係會回來的 ，畢竟喺傾談中，我覺得佢係態度有軟化 。

題外話，如果大家嚟到我哋嘅舖頭，可以放鬆啲，當係自己朋友之間傾偈就可以，真心嘅，放鬆啲同我哋同事普普通通咁傾偈就可以，唔需要見外，亦都唔需要話點樣唔好意思 ，更唔好覺得大家係企喺對立面 。係，或許我哋唔係完美，但我相信公司入邊嘅每位同事都係真心想為每一個客人好的 。開舖頭出來，當然做生意是真的，但比大家試到產品，同我哋同事傾計了解也是真的 。畢竟做這件事，某程度上，都係希望令到大家可以改善生活，唔需要煩惱睡眠問題，可以舒舒服服休息，日間時候就專心拼搏努力，咁其實就已經好好了 。