#096 「驚個𡃁仔唔做，咁我哋去邊度買枕頭」（31/03/2024）

今個星期有日看舖，一位女客人來買枕頭，比錢嘅時候佢話公司同事之間傾開，「好驚 Re Pillow 嗰𡃁仔唔做，遲吓唔知去邊買枕頭」

首先好多謝佢哋咁欣賞，我會當依句係讚賞咁理解 ，能夠講話執咗就唔知去邊買其實都好唔簡單了。但或許更多人想知，係會唔會真係有日 Re Pillow Co. 會執笠。最近香港市場無可否認係面臨緊一啲轉變，做生意嘅確實唔易，部分人都對香港零售前景唔樂觀。我明白大家嘅憂慮，或許可藉週記簡單寫一寫自己諗法：

一、我想可以繼續做落去

由 2020 年自己一個買到一屋枕頭、研究枕頭開始，其實咁耐以嚟我都好想可以做落去。我覺得世界上係需要有一啲人去做一啲市場上無人做嘅事，去真係由用家角度出發去諗如何去解決生活上一啲問題。例如買唔啱枕頭，不斷試來試去，第二朝又頸痛依啲嘢真係好煩心。

生活上工作上，每個人都已經有自己嘅苦惱同困難，仲要日日咁樣瞓唔好其實好辛苦。我好明白因為我試過，個人心情都會煩燥啲，因此我想試吓去解決佢，幫人解決問題。我唔敢講一定fit 哂所有人 ，一定work但係我盡力去做，無愧於心。

新床單亦如是，換床單要抬起又厚又重嘅床褥，一直以來都係咁嫁啦，但當有咗新床單之後，你會發現其實咁樣換床單唔係咁make sense —— 點解要將全屋其中一樣最重嘅嘢耐不久抬起？真係嫌太多力無地方用咩……

確實我低頭慢慢一步一步做，喺過去幾年確實有好多人嘅支持同鼓勵，令我想繼續做落去的，我都覺得依份工作好有意義。話雖如此，會否有日執笠並唔係單單睇我嘅心願，繼續落去下一個因素：

二、我也是一個普通人

我並非一個求富貴嘅人。但我亦如大家一樣，有父母、家人，亦有自己重視嘅人。唔想佢哋為我擔心，亦想可以比到安康生活比佢哋。我不求富貴，平日消費亦好少，但求可以有時多啲陪到父母，星期六日同朋友出去打波、打機，有時間可以陪到自己想陪嘅人，就係咁樣。現實係好殘酷同時好公平，縱使我可能唔想放棄，縱使可能好多客人如何想我繼續做，但如果我無法維持生活，都只可結業，就當你和我大家發了一場夢。生意總係有成功有失敗，好閒。

三、市場從來都係公平的

優勝劣敗，我相信這幾個字，市場往往是最公平的。技不如人，就會被市場淘汰，這是再正常不過的事。盡力去做，處於優勢時唔好樂極忘形，處於低處時咬緊牙根努力捱過，唔好怨「生意難做」、「時不與我」，因為從來做生意都係自己選擇，要為自己負上責任。諗辦法每日解決問題，如果真係唔得，唔好比太大壓力自己，由佢吧。

寫完覺得好似寫得好悲觀咁…… 唔知會否有人誤解。我想再重申一次我係想繼續做落去的，只係純粹近日好似市場上都有啲悲觀情緒，我借題發揮，想從一個超小型小公司角度出發去寫結業依件事。