（圖：攝於10/09 早上5時58分 我返去公司路上，公司附近，香港葵涌）
今個星期最深刻嘅體會係痛。
我係一個頗重感情嘅人。有人同我講一啲發生喺佢身上嘅事情，我好容易會代入到佢嘅感受同處境，尤其係一啲強烈嘅感覺例如痛苦、艱辛、失望，我聽完你自己會好易唔開心。呢樣事情有好有壞：好嘅，係其他人覺得你明白佢，唔好嘅，係我情緒很易受影響，自己好易會失落。可能係一件好細嘅事，但都可以令我好唔開心。
有時當加上公司本來已經好多煩擾苦惱時候，就更加情緒低落。
近期全球供應鏈緊張，加上歐洲嗰面通漲嚴重，對我哋發展其實都好大影響，可能大家未必睇到，但以我哋 Re Pillow Co. 咁蚊型公司，由於我哋都係製造業，其實好難經營。所以有時唔怪之得市面上啲床品企業做嚟做去都係嗰啲大牌子，固中當然有原因。
但同時間我亦好清楚，呢條路係自己揀，無得怨。更何況有邊行係話好好做，好易做？行行都有自己嘅困難。
執筆之時正值中秋佳節，今個星期就唔講太多 Updates 了，我哋星期二晚推出咗 mini 枕頭袋，關於呢個枕頭袋，我又有啲嘢想講。
屬於 Re Pillow 2 mini 嘅枕頭袋其實已經想做一段時間，都係一個想推出好耐嘅產品了。奈何我哋蚊型 Project 仔，有時想 Develop 新產品做新嘢，做啲 Sample 做內部 Testing 是無問題，但如果要做一個實際產品，對我哋會有啲唔易。每日大家都忙緊，人手就得咁多，要放低平日要急住處理嘅事，例如出單，幫客人 Follow Up 啲速遞等等，呢啲都唔想要人等，希望個顧客體驗可以做好啲。加上做製作產品嘅同事就只有咁多，人手不足，車衣間一直都忙住要做現有嘅產品，行唔開做啲新嘢，變咗一直可能啲新產品會推遲咗。所以呢個枕頭袋就真係講咗好耐，終於推出。
再困難嘅日子都有完嘅一日，我哋相信 Re Pillow Co. 會有明天，所以就有明天。
最後，祝諸位不論留港或在外，大家歡度佳節，安康愉快。
#014（04/09/2022）
#016 新一代 Re Pillow 幾時出？（18/09/2022）