#118 裝修進度、開舖日子、專心做好自己（01/09/2024）

先放一張現時的裝修進度圖片，同大家update下近況先。

呢張相片係我喺8月30號星期五去將軍澳東港城影相的見到地面已經做好咗，而且冷氣亦都ready ，後倉嘅間隔已經起到七七八八，四面嘅牆身亦都已經平整咗。相信距離完成不遠矣！事實上，舖頭係喺8月19號開始裝修，現在啱啱好過咗兩個星期，亦都即係10個工作天（因為星期六日商場不容許裝修），進度已有一半，有機會因此在九月中左右完成，總共歷時四星期。

依個就牽涉到下一個問題，到底什麼時候開舖好？

一般來講和以往一樣，我都搵我伯父去擇日，而今次選出來的日子有兩個，一前一後，而且兩個之間相差九日。其實據我伯父所講，較為早嘅日子更佳，較合我用，不過奈何問咗負責編排人手的同事，應該要在較早的日子當日開舖，人手上做不到，只好退而求其次選其後的日子。當然從商者會想選擇較佳嘅日子，但若然無緣也不必強求。因此依家暫定大約新曆九月底開舖。

有時事情就係咁樣，好多事未必一定如自己所願，但係我覺得亦都不需要太刻意求佳景，曾經伯父同我講過一個故事，話說有一個風水師傅去行山考察地方，途經一個小村落見到一老婦，因為師傅非常口渴，於是就問老婦攞杯水飲，但係畢竟小村落食水唔係好乾淨，水入面有沙石，師傅心入面暗中好唔高興。婦人知道佢係師傅就問了佢一啲風水擇日問題，因為師傅仍然諗住水入邊有沙石嘅事，決定故意整蠱依個老婦，刻意將所有風水問題都倒轉答，揀選了一個特別差嘅日子特別差嘅位置俾婦人。婦人不知，按着師傅講嘅嘢去做。

幾年之後，師傅有次經過村落又見到呢個婦人，夫人好高興咁迎接佢話多謝師傅，多謝師傅。原來自從師傅走咗之後，依幾年婦人嘅生活都好好，生活大有改善。師傅就覺得好奇怪，明明揀咗一啲差嘅日子整蠱佢，但係結果出嚟卻咁好。依個故事其實想帶出嘅道理係，豐水玄學之時當然做到當然好，但係亦都無需刻意求佳景，若然心地好、心術正，好似依個婦人咁，佢心入邊係單純同真心，即使揀錯日子，總會有好結果的。

所以故事就講完，結論就係專心做好自己。

今個星期亦都有不同嘅合作機會，亦都同緊不同嘅人去見面，唔知道會唔會有啲乜嘢嘢會夾到出來。依個到時再同大家update。

另外今年年底之前，有機會被袋可以上市，呢一個係我哋一直以來從來都冇做，亦都可以話喺床上用品入邊各種產品入邊，我哋唯一一個沒有做嘅，最後一塊拼圖。有興趣嘅話，密切留意。