#120 出貨忙碌、謙虛學習（15/09/2024）

歡迎大家又嚟到本週週記！又由我嚟同大家講吓最新嘅今個星期嘅工作。

首先過去兩個幾三個星期，其實我們嘅base不少尺寸都處於斷貨嘅狀態，今個星期終於基本上接近所有出晒，開始逐步應該可以恢復穩定，正常供應 。我諗任何人想購買產品都想盡快收到尤其係一啲自己喜歡嘅產品一定會更加想快啲可以即時用到，因此在此方面我都係要繼續努力，希望之後可以解決依啲情況就好似其實枕頭嘅情況都係咁樣 。喺大概數返一兩年前如果睇返再早期啲嘅週記其實以前的枕頭是會斷貨的，但係依家其實我哋就已經解決咗嗰個問題，開始慢慢能夠做到供應穩定，希望日後嘅床單以致未來推出嘅其他產品都能夠可以做到 。

既然講得供應，不如講多少少：其實要解決呢啲斷貨情況，最主要係要摸得熟嗰個需求情況，因為如果假設每個星期嘅需求情況相差得甚遠，好難做一些大型投資去令到供應更加增加，因為實在太多不確定性，好容易會洗大咗錢，然後令到自己產能增加之後，卻發現生意唔夠，最後係會倒閉離場的。因此要花啲時間睇到個市場究竟對這件產品嘅需求有幾多，然後慢慢摸熟再去增加產能會比較穩陣一點。

有時其實我都會怕現時到究竟我嘅產品喺市場上究竟有幾大嘅競爭力，以及有冇一啲風險可能會令到我一個大浪冚埋嚟，然後就一無所有…… 如此種種，還是需要時間去印證，但我最近睇咗「彩豐行」老闆嘅一個訪談，講到如果產品係好，行得慢啲最後都會行得成功嘅。

當然以上嘅諗法並唔係代表咩都唔洗做，依個正好相反。現時係吸收前人經驗同知識的最好時候。雖然無人能知道未來亦無人可保證成功與否，但一定要做好自己本分先。

可能有啲人會唔理解點解我喺上星期週記會去睇麥當勞同埋Starbucks嘅商業書，好似其實人哋嘅行業同我做緊嘢都唔一樣，點解要去睇？個原因係因為其實都會有得着的，好多時人有一個趨向會覺得「我嘅case唔同㗎」、「我嘅情況好特殊㗎」、「我依家面對嘅嘢係之前嘅人冇面對過」等等諗法，其實我並唔係否定100% 無人會有特殊Case，但個人覺得就唔係咁樣的 。其實好多時我哋面對嘅每一日嘅問題以前有人都面對過，當然未必會係完全一樣，例如現在有智能手機同埋互聯網，同以前會唔一樣，但其實個重點係要謙虛地去睇返以前嘅人嘅經歷，然之後人類有一樣嘢好處就係我哋可以去活用人哋嘅經歷，唔使自己行一次痛一次先知道學習到。我可以都好老實講喺上星期講嘅嗰兩本書入邊我都有好多得着同埋學習到，係應用到喺現時嘅發展之上。

謙虛去學，然後順其自然。

另外，今個星期去了將軍澳裝修中嘅舖到行了一轉，師傅話有啲延遲，應該距離完工仲有一個多兩個星期，因此應該9月最尾幾日先開到張，雖然同原先定嘅日子有差距，但無辦法依啲事情無法控制，就如此吧。