#125 我應否辭職創業？（20/10/2024）

最近有幾位朋友都提到自己希望創業，開舖頭賣東西，估唔到原來有唔少人都有依個夢想。並唔係一個叻嘅生意人，也不是創業成功，不過可能都可以寫少少嘢看看幫唔幫到手。

可能因為自己讀書時期已經自己經常試不同的東西，失敗之後又再試過，現在諗返轉頭其實就係不停創業又失敗又再來，我偏向覺得創業唔係咁容易，亦都唔可以用「夢想」去形容。因為夢想，感覺似好似係一個「終結」，達到咗就搞掂，人生就得以圓滿，王子同公主可以開心快樂活下去。除非你有好多好多錢，否則我諗創業並唔係咁的，而係一個不斷跌低起返身，不斷解決問題嘅過程。

朋友現在已經有正職，想開舖嘗試慢慢建立收入，然後長遠嚟講可以辭職，單靠自己的生意生活。佢本身諗住每個月用大約一萬蚊左右租一個地方建立生意，租期一年。

個人淺見係依個階段唔應該租地方先，因為畢竟暫時仍未知道到底個生意會做得好唔好，萬一係最不幸嘅情況係要交足 1 萬 x 12 個月，總共 12 萬去試依一個 Concept，當然唔係所有生意都可以網上做，但如果可以的話，可以先試下用網上嘅模式去運作下，睇吓搵唔搵到客先，然後開始慢慢做到生意之後才去諗租地方。如果生意係冇辦法網上，必須要租地方的話，我覺得可以試吓啲幾千蚊平平哋租嘅試住先，我知道，下一個問題就係平嘅地方可能地點唔理想或者尺寸唔夠大，咁可能需要調整一下本身個生意嘅模式同埋做嘅嘢，去配合返依個平少少嘅地方。總括嚟講係其實我當然都想朋友成功，但我更加唔想係佢因為咁樣而輸錢，因為開頭的時候如果失敗的話，可能會打消左這個念頭，之後其實可能有機會會成功，但係就不再去嘗試了，因為畢竟 12 萬都係一個數字，如果可以唔使輸的話，當然就最好。假設租一個平一半的地方， 6 萬都會好啲。

另外另一個問題就係，應否辭職創業。依樣嘢我覺得係有啲難以一概而論，我偏向覺得如果一件事情要做得好，應該要全心全力去做，因為你如果只係間中做一做，有時做，是不能夠做得好的。要做好一件事係需要將佢融入喺自己生活之中，係要比起返工更加上心，即係譬如你沖涼的時候又會諗吓，你出街行街睇戲食飯的時候又會諗吓，然後去廁所望住卷廁紙的時候又會諗到靈感，咁樣先可以做得好。

但係咁樣並唔代表我支持辭職創業，因為實在風險比較大 —— 畢竟做生意是高難度動作，實在很容易失敗的，我現在每日都喺度掙扎中，好明白當中的困難。如果剛剛開始，每一樣事情都係第一次做，就會更加困難，我好明白（因為我都係）。我覺得如果可以能夠不用辭職，都可以做到你想創業嘅該一門生意嘅話，盡可能唔好辭職。嘗試學習去平衡你本身的正職工作，以及自己創業的工作，因為依種平衡同埋如何去谷自己做到咁多嘢，都係一個日後非常有用嘅技能，因此依個係一個訓練。除此以外，你仲可以能夠得到本身正職俾你嘅收入回報，避免自己到時着過真係不幸失敗時冇依靠。始終穩陣都好重要。

不過當發展到咁上下，如果覺得開始慢慢有一批客人，亦都反應唔錯，客人係真心鍾意你嘅產品（必須要憑最好嘅本心去做先可以做到，不要成日諗住要賺錢），我會建議真係全心投入去做，應辭職。因為要開始為自己公司的同事（如有）以及客人負責任，佢哋唔應該只能夠得到你嘅一半，你應該付出你嘅所有比佢哋。你去買一件產品/去一間餐廳食飯，你都唔想知道個老細，原來佢只係擺一半嘅心機落去依件產品或者食物上面，係咪？將心比心，同樣你都要付出所有。

我覺得，做生意係要憑個心去做，而如果你創業去到依個階段，去吧，全心投入。希望以上幫到閱讀緊嘅你！

Ryan