#155 舊床單收集計劃開始試行和感想（25/05/2025）

話說剛過去今個星期出咗一個舊床單收集 Post，反應都唔錯 。依個舊床單收集活動係同 SAA 保護遺棄動物協會一齊合作做的，其實都已想做咗一段時間，但奈何工作一忙，例如啲各種斷貨問題、產品想要添加新款、不斷改善等，依啲稍為其次嘅事就會放埋一邊 。喺 4 月，如果有留意開 Re Pillow Co. 社交平台就知道（賣個廣告：https://facebook.com/repillowco、https://instagram.com/repillowco，我曾有日入咗元朗 SAA 會址參觀同亦都傾下計，影咗啲相亦寫咗啲嘢，嗰日就落實去做 。

屋企兩隻貓都係領養，因此或許如此特別想試吓借助自己有嘅資源行多一步做多少少 ，好似今次咁，尖沙咀本身都有一間舖，不如試吓整個桶收集舊床單比人可以買新床單時，都可以放低舊床單，令舊床單都可以有用嘅地方 。有時生活有好多事唔係話自己想點就點，有好多人和事你會覺得點解咁都有、乜咁都得。但有時事情就係咁，與其花時間喺留意一啲令自己唔開心嘅事，而嗰啲係其實你唔開心完諗完都無法改變嘅，不如試吓諗下有啲咩可以喺自己位置做到，我信每一個人企喺社會唔同崗位，都一定有自己可做到嘅事 。被遺棄動物係一個議題，同樣有其他好多事都係可以人人做多少少令個世界好啲嘅 。依個係我個人睇法 。

人生時間有限，要選擇值得花時間嘅地方去花時間 ，盡量令時間過得有意義，老土嘅但係係過程中，記得愛身邊嘅人多啲，比佢哋知你雖然工作好忙，或者亦都好多關心說話好難講出口，但你其實心中都有佢哋 。

以前唔覺得，但依家慢慢越嚟越覺得依個世界無人係會比自己嘅屋企人更加愛你，因此要學識珍惜，要生性，如果年輕嘅（我知你實嫌我老土），要唔好令父母操心。見到仔女可以自己獨立、生活工作上軌道，組織家庭幸福生活，得閒多啲返嚟食飯，做父母就會放心 。

講講下講遠咗，講返今個星期嘅床單收集計劃。雖然現時試行開頭反應唔錯，但我暫時亦不敢太樂觀，原因是其實工作依幾年其中一樣我最學到嘅係「反應好嘅時候唔好太樂觀，反應唔好時候亦唔好太悲觀 --- 依個看似簡單嘅道理，係非常真亦都唔係人人能夠做到。我舉例：現時香港零售、飲食、地產都有好多人覺得唔掂，並且甚至有啲人睇到好死，覺得係完全玩完亦都以後唔會有彎轉，但事情係唔係一定會係咁我覺得有時亦都唔好睇得太盡。可能係，亦都可能唔係，無人知道。做好兩手準備唔好太買哂一邊會比較好。例如好似床單收集計劃，現時可能反應好，但有時難保之後會不會仍然有人來捐贈，因此都係留意長啲時間好啲。希望可以長遠都繼續有人來啦。咁樣，買咁新床單，舊床單都可以有可以發光嘅地方。