#158 新床單印花系列正式登場、商業合作、關於看書（15/06/2025）

一直以嚟都有唔少客人問，我哋可唔可以喺淨色以及卡通聯乘以外，加一啲花款床單，多個選擇。當然係無問題啦，依個亦都係我想做到嘅 —— 我想可以比到唔同人都可以享受到新床單嘅方便，而係亦都可以用到自己想用嘅床單風格，或者鍾意嘅聯乘系列 —— 可以展示到自己個人風格，又可以做一個現代人，解決換床單嘅問題。因為依啲有時好難預算時間，因此喺過去幾年學識一個道理，喺未好 firm 做好前，唔好太快比個日子，因此一直無講。而依個週末，終於可以正式登場。

現時喺門市同網上已開售，大家可以去買到。但依度並非寫產品介紹同賣廣告嘅地方，因為依個係「週記」，係我回憶當時小學時，會每星期好期待寫嘅一份功課，將一個星期發生嘅事或者想同老師講嘅事寫低嘅地方。咁多年過去，我還是我，我都係想可以每星期寫返啲嘢，因為我諗，之後若干年後睇返，相信會好有意義。

商業合作

最近有傾緊一啲合作，係之後可能會發生，但實在因為由於事情需要保密，唔可以喺度寫。係一啲都相當有好大影響嘅合作嚟，應該會係對我哋有好大幫助嘅事。不過現時實在唔係時候去公開，但放心我一定之後喺合適時候會公佈的。我係一個好普通嘅人，我好多事都係唔識而第一次試，我想可以盡量將啲過程紀錄同公開，可以希望幫到日後其他有志創業嘅人去參考。個世界唔應該係咁，我相信應該要有人試吓真係做啲好啲嘅產品，去試吓改變依個行業，令用家真正受益，雖然我唔知自己會唔會可以成功，但我都想試下。

不過最近確實有一個感覺係呢個世界總係公平，邪不能勝正，而如果你憑着最好嘅心去做一啲有意義嘅事，努力總會有人看見，機會係會嚟比你。相反如果你係有一啲唔係咁好嘅心嘅話，相由心生，人哋係會感覺到 。有啲人可能覺得我天真或者覺得呢啲係呃細路嘅說話，甚至覺得我咁都信 。但係我相信係真嘅，依樣嘢係慢慢工作開始遇到多啲人多啲事，我慢慢感覺到。

關於看書

直至3、4年前，我一直雖然有睇唔少嘅書，但一直都有少少睇唔到睇書同工作嘅關連，亦即，好多時可能睇完書嘅內容，覺得好有道理，但似乎無套用嘅地方，又或者話，日常事務其實都頗為「手板眼見功夫」毋須用到嗰啲書中嘅理論/教導。但雖則如此，我相信睇定係對於個人嘅心態培養係有用（因為會將內裏嘅潛移默化，成為自己 default setting）因此我係keep住無停。去到近一兩年，最近睇書，書中知識開始有用，開始可以套用到喺平時工作上。不過關於睇書亦都想講多樣嘢就係睇書最重要係要應用。有時有見到有啲人會好鍾意睇書，睇完一本到一本，但如果無地方或者沒足夠應用嘅空間，睇書相對只會係知識上增長而沒有真係幫到你去改變自己人生嘅軌跡。我以前覺得睇得越多書越好，但依家我慢慢覺得執行都好重要，如果只係睇、學識，但無地方去套用，或者未必係最善用時間嘅方法。

最近剛剛睇完嘅書叫《Same as Ever》，亦係圖中嗰本書。朋友推薦，都係一本唔錯嘅書。