#162 痛楚越深，得到的越多（13/07/2025）

圖：屯門新舖，終於在西北方有點了。

無人係喜歡痛楚，但最近無可否認係漸漸發現其實生活中好多好多事情，若然經歷嘅痛苦同煎熬係越刻骨銘心，嗰種折磨係越令你難以承受嘅，其實對我個人係越好。 

有好多人可能聽到會覺得我係痴痴地，係唔係有被虐待傾向，但依個係事實。安逸嘅生活係無法令你逼出潛能同去做出其他人做唔到嘅事出來。唯有極度痛苦、折磨，先可以逼到每個人去想辦法要絕地求生，然後真係做到啲好嘢出來。可能不少人未必會承認，但係我相信絕大部份人心底裏知道，依個確係事實。 

喺依幾年，其實依家有時都依然係，好多情況我實在經歷好多喺心理上好大痛苦同壓力嘅日子，尤其係去到現時，有時我覺得自己係一個「reluctant businessman」，孤獨地去做事而有時都真係會做到覺得咁難，好攰覺得唔想做。但我明白「感覺」同實際行動係可以切割的。即係即使覺得辛苦，係同應唔應該完成事情係無關係的。再辛苦你都要完成佢，就係咁樣。而因為經歷嘅辛苦同痛苦越大，而當然自己係迎難而上繼續照去同諗辦法，最終得到嘅會係更大。 

就好似，你逼自己做到夜一夜都繼續而唔休息，係好辛苦但係逼到自己潛質出來，如果好舒服安逸，係不可能谷到成績出來。 

當然以上所提到嘅都係要睇返個人情況，每一個人嘅承受能力同強弱位置都不同，例如我個人是畏高，可能要去叫我逼我去跳降傘我未必能做到。亦都有時心理壓力每人可承受嘅範圍都不同，要量力而為。但以上嘅理論其實應該是可以合用於好多人情況的。