#171 請教前輩（14/09/2025）

最近實在太多煩心事情。我睇下應該點樣講。我係一個普通嘅人，而一個普通嘅人佢處理到嘅事多數都係自己五呎範圍內嘅事。以前我一直都係用依個方法去處事的，一日嘅難處一日就夠㗎啦。然而隨住規模大咗，其實工作嘅難度同埋廣闊程度都會提高。以往可能做嘅方法，係唔再夠用。而依個係比較 Kick 手的。因為我先講一講有兩個可能嘅做法。第一個做法：逼自己要去改變，要去用新嘅方法去處事，依個對於好多人嚟講係會困難因為依個牽涉到係需要改變自己，而我講緊嘅係真係改變自己，唔係嗰啲練大隻啲，或者短期內用另一個自己都唔係好心甘情願嘅方法去處理事情嗰啲，而係真係連自己處事方法都要改變，成個人唔同哂嘅改變。依個係好困難，但依個係如果需要去再進一步，要去另一階段，需要嘅做法。另一個做法係去接受自己就係依一個水平，盡量唔好挑戰自己能力範圍以外嘅事，即係，如果做開係三四間門市，就Keep住三四間門市好啦，開一間時關一間，喺管理上 Keep 住係咁上下，咁樣喺所有嘢包括 庫存管理、風險、租金、人工、人事糾紛上面，都會 Keep 住係一個自己可以 Managable 嘅水平，行落就會穩陣。但某程度上亦都代表，係有啲不進則退。

今個星期見咗一個前輩，我同佢坦白分享我自已在工作上遇到嘅困難，佢比咗好多好切實可以執行到嘅方法比我。好有用，因為嗰啲方法，係我自己諗唔到亦都真係好高明嘅方法 —— 喺依啲位我會見到係我自己真係有啲嘢必需請教人，而如果搵啱人問，係必定事半功倍。不過要留意係每個人都只能陪第二個人一程，無人可以陪你到到最尾，去到最後，你始終都要自己行。所以透過借用他人經驗係好好用，但唔係一個萬用嘅，一個方法可以走天崖方案。